დისნეიმ წელს დაგეგმილი განახლებული პრემიერების განრიგში New Mutants-ის გამოსვლის თარიღიც დააანონსა: 28 აგვისტო.

კორონავირუსის გავრცელების გამო New Mutants ის ერთ-ერთი ფილმი იყო, რომლის წლევანდელი პრემიერაც გაურკვეველი დროით გადაიდო, თუმცა უკვე ვიცით, რომ, დიდი ალბათობით, მის ხილვას ზაფხულის მიწურულს მაინც შევძლებთ.

სუპერგმირების შესახებ გადაღებული ეს ფილმი მარველის სამყაროში ვითარდება და X-Men-ის ფილმების სერიის სპინოფია. ფილმის აღწერაში ვკითხულობთ: "საშინელებათა ჟანრის თრილერი, რომელიც იზოლირებულ კლინიკაში ვითარდება, სადაც ახალგაზრდა მუტანტებზე ფსიქიატრიულ მონიტორინგს აწარმოებენ".

New Mutants-ის ხილვას მაყურებლები უკვე ძალიან დიდი ხანია ელოდებიან: მისი გადაღებები 2017 წელს დასრულდა, თუმცა 2018 წელს მისი პრემიერა Deadpool 2-ის გამოსვლის გამო გადაიფიქრეს, რათა კინოგაქირავებაში ხელი არ შეეშალა; 2019 წელს იმავე მიზეზით გადაიდო პრემიერა Dark Phoenix-ის გამოსვლის გამო, წელს კი კორონავირუსის გავრცელებამ დააყენა ეჭვქვეშ მისი კინოთეატრებში ხილვის შესაძლებლობა.

ფანების ნაწილს აღარც სჯერა, რომ ოდესმე ფილმის ხილვას შეძლებენ, თუმცა უფრო ოპტიმისტ გულშემატკივრებს ისღა დარჩენიათ იმედოვნონ, რომ ამჟამინდელი პრემიერის თარიღი მაინც აღარ შეიცვალოს.