გაეროს გენერალური მდივანი, ანტონიო გუტიერეში რელიგიურ ლიდერებს მოუწოდებს, რომ მავნე და არაზუსტი გზავნილების გავრცელებისგან თავი შეიკავონ. ამის შესახებ გუტიერეშმა სპეციალურად გამართულ კონფერენციაზე განაცხადა, სადაც პანდემიასთან ბრძოლაში რელიგიური ლიდერების როლზე ისაუბრა.

როგორც გენერალური მდივანი ამბობს, ექსტრემისტები და რადიკალური ჯგუფები ცდილობენ ხალხის დაუცველობა საკუთარი ინტერესებისთვის გამოიყენონ.

მისი თქმით, პანდემიიის დროს რელიგიურმა ლიდერებმა სტიგმის, სიძულვილის ენის, ეთნონაციონალიზმისა და კონფლიქტების გაძლიერებას ხელი არ უნდა შეუწყონ.

გუტიერეშის განმარტებით, რელიგიურ ლიდერებს შეუძლიათ მნიშვნელოვანი როლი შეასრულონ პანდემიასთან ბრძოლაში და ჯანდაცვის მსოფლიო ორგანიზაციის ისეთი რეკომენდაციების გავრცელებაში, როგორიც სოციალური დისტანციისა და ჰიგიენის დაცვას ეხება.

"ჩვენ დეზინფორმაციის გავრცელებას ვებრძვით, რელიგიურმა ლიდერებმა გამოიყენეთ თქვენი საკომუნიკაციო საშუალებები და მხარი დაუჭიროთ მთავრობებსა და ჯანდაცვის მსოფლიო ორგანიზაციას რეკომენდაციების გავრცელებაში", — განაცხადა გუტიერეშმა.

გენერალურმა მდივანმა პანდემიის ფონზე, ქალთა უფლებების დარღვევაზეც ისაუბრა და რელიგიურ ლიდერებს ქალთა მიმართ ძალადობის დაგმობისკენ მოუწოდა. მისი თქმით, მსგავსი ქმედებები კატეგორიულად მიუღებელია და ამას არცერთი რელიგია არ ასწავლის.