ჭავჭავაძის გამზირზე ასფალტი ისევ აყარეს. მთავარი არხის ინფორმაციით, რეაბილიტაციის დროს სანიაღვრე ჭების მოწყობა დაავიწყდათ.

ამ ინფორმაციას თბილისის მერიაში არ ადასტურებენ. უწყებაში On.ge-ს უთხრეს, რომ ჭავჭავაძის გამზირზე ასფალტის ბოლო ფენის დაგება იწყება და ჭები შესაბამის ნიშნულზე უნდა წამოწიონ.

" პირველი ფენის დროს ჭები არის უფრო მაღლა, ვიდრე ასფალტია, რაც ნიშნავს იმას, რომ შესაძლოა ავტომანქანების გადაადგილებისთვის შეეშალა ხელი. ამიტომ მოხდა მისი დაფარვა დროებით. ეს არის ჩვეულებრივი, დაგეგმილი პროცესი და არაფერი განსაკუთრებული არ ხდება", — განუცხადეს On.ge-ს მერიაში.

ჭავჭავაძის გამზირზე სარეაბილიტაციო სამუშაოები 2019 წლის 30 მაისს დაიწყო. სამუშაოების ფარგლებში დაგეგმილია ასფალტის საფარისა და მიწისქვეშა კომუნიკაციების განახლება.