პრემიერმინისტრ, გიორგი გახარიას თქმით, ყველას უნდა ახსოვდეს, რამხელა წვლილი შეიტანა საქართველომ ფაშიზმზე გამარჯვებაში და ვისაც ეს ავიწყდება, უნდა გაახსნონ. ამის შესახებ მან ვაკის პარკში უცნობი ჯარისკაცის საფლავთან განაცხადა.

მისი თქმით, საქართველოსნაირი პატარა ქვეყნისთვის დიდი გამარჯვებისთვის 300 000 გმირის შეწირვა მაინც ძალიან დიდი ტრაგედია და წვლილია.

"75 წელი გავიდა, როდესაც ამ პატარა ერმა 300 000 გმირი შეწირა ამ გამარჯვებას, მსოფლიოს ჯანსაღი ძალების გამარჯვებას ფაშიზმზე, დიდ ბოროტებაზე. მაგრამ ჩვენ ხანდახან გვავიწყდება, ხოლმე რომ საქართველომ ამხელა მსხვერპლი გაიღო.ამიტომ, ყოველთვის უნდა გვახსოვდეს, პატივი მივაგოთ და ამასთან ერთად, ბევრს უნდა გავახსენოთ, ვისაც ავიწყდება, რამხელა ღვაწლი, წვლილი შეიტანა საქართველომ, ქართველების სიცოცხლით ამ გამარჯვებაში. ამას ძალიან დიდი მნიშვნელობა აქვს და ჩვენც უნდა გვახსოვდეს და სხვებსაც ყოველთვის უნდა გავახსენოთ", — განაცხადა გახარიამ.

დღეს, 9 მაისს მეორე მსოფლიო ომის ვეტერანები ფაშიზმზე გამარჯვებას აღნიშნავენ. ევროპული ქვეყნების აბსოლუტური უმრავლესობა, გარდა პოსტსაბჭოთა ქვეყნების ნაწილისა ფაშიზმზე გამარჯვების დღედ 8 მაისს მიიჩნევს, რადგან სწორედ ამ დღეს გამოაცხადა გერმანიამ კაპიტულაცია. 9 მაისი კი საბჭოთა კავშირის დაწესებული დღესასწაულია, რადგან სწორედ ამ დღეს წითელ მოედანზე სამხედრო აღლუმით აღნიშნეს გამარჯვება.