დაავადებათა კონტროლის ეროვნული ცენტრის დირექტორის, ამირან გამყრელიძის თქმით, კაცობრიობას ვაქცინაზე უკეთესი წამალი, რომელიც იცავს ადამიანის სიცოცხლეს, ჯერ არ გამოუგონია. ამ თემაზე მან გადაცემა 360 გრადუსში ისაუბრა.

"მე ვიცი ეს ანტივაქსერული მოძრაობა, დიდი გლობალური მოძრაობაა. არიან ამის მიმდევრები საქართველოში, ისევე, როგორც ევროპის ქვეყნებში, მაგრამ, ჯერჯერობით, ამ მოძრაობამ ვერ დაძლია ის საღი, სამედიცინო აზრი და მიდგომა, რომ ვაქცინა შედის მედიცინის ყველაზე დიდ აღმოჩენათა პირველ სამეულში", — თქვა ამირან გამყრელიძემ.

მან ჩამოთვალა ის დაავადებები, რომელთა დამარცხებაც ვაქცინის გარეშე შეუძლებელი იქნებოდა. მათ შორის მან დაასახელა, ცოფი, რომელიც გამყრელიძის თქმით 100%-ით სასიკვდილო დაავადება, წითელა, პოლიომელიტი და ყვავილი.

გამყრელიძის თქმით, კორონვირუსის ვაქცინაზე მუშაობა დაჩქარებული ტემპით მიმდინარეობს და შემოდგომაზე, სავარაუდოდ, შესაძლებელი იქნება თქმა, როდის დაიწყება ადამიანების აცრა. მისი განცხადებით, წელს საქართველო გრიპის ვირუსი შედარებით მარტივად გადაიტანა, რადგან შარშან 140 ათასამდე ადამიანი აიცრა.