მმართველი პარტიიდან, ქართული ოცნებიდან გასული დეპუტატი თამარ ჩუგოშვილი აცხადებს, რომ "შოკირებულია" მისი ყოფილი თანაგუნდელის, მამუკა მდინარაძის განცხადების გამო, თითქოს, კოკა ყანდიაშვილს 2014 წლის შემდეგ პარტიაში არ უმუშავია. TV პირველის დღის ამბებში დიანა ტრაპაიძის კითხვაზე, თუ რისი თქმა შეეძლო ქართული ოცნების ყოფილ წევრს მდინარაძის ნათქვამზე, ჩუგოშვილი ასე პასუხობს:

"არ ველოდი, რაზეც მამუკამ ისაუბრა, რა ვიცი, მუშაობდა ადამიანი იქ და ვხედავდი და წარმოუდგენელია, სიტყვებს ვერ ვპოულობ. ასეთი რამ, რომ ფაქტია იქაა ადამიანი და უცებ, აღმოჩნდა, რომ მელანდებოდა ამ წლების განმავლობაში... ამას არ ველოდი".

ქართული ოცნების ლიდერმა, მამუკა მდინარაძემ პარტიის ოფისში ყალბი ფეისბუქგვერდების გაუქმებაზე გამართულ ბრიფინგზე თქვა, რომ 2014 წლის შემდეგ მასთან არც ოფიციალური და არც არაოფიციალური ურთიერთობა ქართულ ოცნებას არ ჰქონია:

"არა, ის გაცილებით ადრე იყო ქართულ ოცნებასთან კონტაქტში, ოფიციალურად მათ შორის და 2013, მე არ მინდა ვცდებოდე, 2014 წლის შემდეგ მასთან ოფიციალური კონტაქტი არ ჰქონია ქართულ ოცნებას. არც არაოფიციალური კონტაქტი მათ შორის. არაოფიციალურ კონტაქტი თუ ჩათვლით იმას, რომ ის მხარდაჭერას გამოხატავდა ქართული ოცნების მიმართ და ის უფრო მეტად ქართული ოცნების მხარდაჭერაზე უფრო ნაციონალური მოძრაობის და მისი დანაყოფების მიმართ ბრძოლით გამოირჩეოდა, ეს თუ არაოფიციალური კონტაქტია, მაშინ კი ბატონი. სხვა შემთხვევაში არც არაოფიციალურ კონტაქტს არ და ვერ დაგიდასტურებთ".

ესპერსონა და კოკა ყანდიაშილი

ფეისბუქმა წაშალა გვერდები, რომლებიც ვებგვერდ ესპერსონას ეკუთვნოდა, ან უბრალოდ მასთან იყო დაკავშირებული. საიტზე არსებული აღწერის მიხედვით, ეს არის მედია პლატფორმა, რომელიც ერთ სივრცეში აერთიანებს როგორც პოპულარულ საჯარო ფიგურებზე სიახლეებსა და "ცხელ" ამბებს, ისე პოლიტიკის, ბიზნესისა და საზოგადოების მიმოხილვას. საიტზე ნახავთ განცალკევებულ სეგმენტს როგორც ქართველ, ისე უცხოელ პოპულარულ პოლიტიკოსებზე, ცნობილ ადამიანებზე, სპორტის ვარსკვლავებზე და ა.შ.

ესპერსონას მფლობელი კოკა ყანდიაშვილია. გამოცემისა და პრემიერმინისტრის ოფისის საიტის თანახმად, 2013 წლის აპრილიდან დეკემბრამდე, ქართული ოცნების მმართველობის პირობებში, ყანდიაშვილი საქართველოს მთავრობის კანცელარიის საზოგადოებასთან ურთიერთობის დეპარტამენტს ხელმძღვანელობდა. ამის შემდეგ, იგი მთავრობის კანცელარიის საზოგადოებასთან ურთიერთობის საკითხებში კონსულტანტად გადავიდა.

დეზინფორმაციასთან დაკავშირებული ოპერაციების შესწავლისას კოკა ყანდიაშვილის სახელი და გვარი არაერთხელ ამოტივტივებულა. ის დაკავშირებული იყო ქართულ ტროლების ქარხანასთან, რაზეც როგორც ადგილობრივი მედია, ასევე და არასამთავრობო ორგანიზაციები წერდნენ. თუმცა, ყანდიაშვილი ამ კავშირს გამუდმებით უარყოფდა. სხვა ანგარიშებთან ერთად, ფეისბუქმა ასევე წაშალა ყანდიაშვილის პერსონალური ანგარიში და მისი ოფიციალური გვერდი, რომელსაც თავად მართავდა.

ფეისბუქმა ასევე წაშალა კოკა ყანდიაშვილის ყოფილი ცოლის, ნონა ყანდიაშვილის პირადი ანგარიში. ის 2012 წლიდან 2017 წლამდე მთავრობის კანცელარიის მედიიასთან ურთიერთობის განყოფილების ხელმძღვანელი იყო, 2017 წელს კი თბილისის საკრებულოს საზოგადოებასთან ურთიერთობის ხელმძღვანელად დაინიშნა. ნონა ყანდიაშვილი ასევე პირდაპირაა დაკავშირებული ქართულ ოცნებასთან, მის საჯარო ჩანაწერებში ასევე ვხვდებით პარტიისთვის გაღებულ შემოწირულობებს.

ესპერსონას სახელით მინიმუმ რვა გვერდი არსებობდა, რომელთაც სიტყვა ესპერსონას სხვადასხვა ვარიაცია ერქვათ. ამ გვერდების ჯამური გამომწერების რაოდენობა დაახლოებით 40 ათასს შეადგენდა. ზოგი გვერდი აზიარებდა კონტენტს ესპერსონას საიტიდან, თუმცა ზოგიერთს მინიმალური აქტივობები ჰქონდა.

როგორც DFRLab-მა დაადგინა, ესპერსონას დასახელების გვერდებიდან შვიდი მართავდა ფეისბუქ ჯგუფებს, რომლებიც შესწავლის შეემდეგ ფეისბუქმა წაშალა.