ყინწვისის კეთილგონიერი ავაზაკის მონასტრის წინამძღოლი, არქიმანდრიტი საბა ჟღენტი გამოძიებისთვის მიცემულ ჩვენებაში ამბობს, რომ არ დაუნახავს ვინ ესროლა. სასულიერო პირის ჩვენებას TV პირველი ავრცელებს.

ამავე ეთერში ბრალდებული მამა დავითის ადვოკატი, ალექსანდრე კობაიძე ამბობს, რომ მომხდართან მისი დაცვის ქვეშ მყოფის შემხებლობას არც არქიმანდრიტი საბა და არც ექსპერტიზა არ ადასტურებს.

მისი თქმით, შემთხვევის ადგილიდან ამოღებულ ვაზნებზე ჩატარებულია ექსპერტიზა, რომლებზეც მამა დავითის შემხებლობა არ დასტურდება.

ასევე, Tv პირველის მიერ გავრცელებული ჩვენების მიხედვით, არქიმანდრიტი საბა ამბობს, რომ სროლის შედეგად არავითარი დაზიანება არ მიუღია და არც სამედიცინო ექსპერტიზას საჭიროებს. თუმცა, ამავე ჩვენებაში ადასტურებს, რომ მანქანა, რომლითაც შემთხვევის დროს გადაადგილდებოდა, სროლის შედეგად დაზიანდა და რამდენიმე ტყვია მოხვდა.

"გაისმა დიდი, სავარაუდოდ, სროლის ხმები. მე მაშინვე მივხვდი, რომ გვესროდნენ ცეცხლსასროლი იარაღიდან. სროლა ხორციელდებოდა ჩვენგან მარჯვენა მხარეს, თუ საიდან ვერ დავინახე. ასევე, ვერ დავინახე პირი, ვინც გვესროდა", — ნათქვამია არქიმანდრიტ საბას ჩვენებაში.

ყინწვისის მამათა მონასტრის სასულიერო პირი განზრახ მკვლელობის მცდელობის ბრალდებით 27 აპრილს დააკავეს. შინაგან საქმეთა სამინისტროს ცნობით, ბრალდებულმა, გორის რაიონის სოფელ რიეთის საავტომობილო გზაზე გადაადგილებისას, სავარაუდოდ, ავტომატური ცეცხლსასროლი იარაღიდან ცეცხლი გაუხსნა დაზარალებულის მართვის ქვეშ მყოფ ავტომანქანას, რის შემდგომაც შემთხვევის ადგილიდან მიიმალა.

მათივე ცნობით, მომხდარზე გამოძიება სისხლის სამართლის კოდექსის 19-108-ე მუხლით და 236-ე მუხლის მე-3 და მე-4 ნაწილებით გრძელდება, რაც განზრახ მკვლელობის მცდელობასა და ცეცხლსასროლი იარაღის უკანონო შეძენა-შენახვას გულისხმობს. დანაშაული 7-დან 15 წლამდე ვადით თავისუფლების აღკვეთას ითვალისწინებს.

სასამართლომ სასულიერო პირს აღკვეთის ღონისძიების სახით პატიმრობა 29 აპრილს შეუფარდა. 30 აპრილს რუის-ურბნისის ეპარქიამ განცხადებაა გაავრცელა და უარყო, რომ ბრალდებული მამა დავითი ყინწვისის მამათა მონასტრის წინამძღვარია. მათი განცხადებით, ეს ინციდენტი მათ ეპარქიაში არ მომხდარა.

მედიაში გავრცელებული ინფორმაციით, ყინწვისის მონასტერში მოღვაწე მამა დავითმა ყინწვისის კეთილგონიერი ავაზაკის მონასტრის წინამძღვარი, არქიმანდრიტი საბა ჟღენტი დაჭრა. თავად არქიმანდრიტი საბა ჟღენტი უარყოფდა, რომ იგი სასულიერო პირმა დაჭრა. მისი თქმით, დაჭრასთან დაკავშირებით ცრუ ინფორმაცია გავრცელდა და ამით "გულნატკენია".

რუის-ურბნისის ეპარქიის მიტროპოლიტი იობი კი ამბობს, რომ ყინწვისის მამათა მონასტრის სასულიერო პირის მიერ მკვლელობის მცდელობაზე ამბობს, რომ თავად, როგორც ეპარქიის მმართველმა, ამაზე პასუხი არ უნდა აგოს.