დღეს, პრესის თავისუფლების მსოფლიო დღეს, 19 საათზე 15-ზე მეტმა ეროვნულმა და რეგიონულმა მაუწყებელმა ერთი წუთით ეთერი გათიშა. ეკრანზე გამოჩნდა წარწერა: "სოლიდარობა აჭარის საზოგადოებრივი მაუწყებლის ჟურნალისტებს". სოლიდარობის აქციას შეუერთდნენ მაუწყებლები, მათ შორის:

  • TV პირველი;
  • ფორმულა;
  • პალიტრა;
  • მთავარი;
  • კავკასია;
  • ტვ 25;
  • ტოკ ტვ;
  • გურია;
  • მეცხრე ტალღა;
  • აგროგარემო;
  • მეცხრე არხი;
  • მეგა ტვ;
  • ოდიში ტვ;
  • ბორჯომი ტვ;
  • რიონი;
  • მარნეული ტვ;
  • თრიალეთი;

  • იმერვიზია ტვ;

  • გურჯაანი ტვ;

  • თანამგზავრი ტვ.

მაუწყებლების სია არასრულია და შესაძლოა აქციას სხვებიც შეუერთდნენ. სოლიდარობის აქციას არ შეუერთდნენ საზოგადოებრივი მაუწყებელი, იმედი, რუსთავი 2 და მაესტრო. აქცია მედიაკოალიციის ორგანიზებით გაიმართა და მისი მიზანი აჭარის ტელევიზიის ჟურნალისტებისთვის სოლიდარობის გამოხატვა და საზოგადოებისთვის აჭარის მაუწყებელში ბოლო პერიოდში განვითარებული მოვლენებს შეხსენებაა.

4 მარტს აჭარის მაუწყებლის საინფორმაციო სამსახურის უფროსის მოვალეობის შემსრულებლად დაინიშნა გიორგი აბაზაძე, რომელიც სოციალურ ქსელებში ჰომოფობიური და სექსისტური შინაარსის გზავნილებით გამოირჩეოდა. ჟურნალისტების განცხადებით, მისი შერჩევის პროცესი გაუმჭვირვალე იყო. მათი თქმით, დირექტორს, აღნიშნულ თანამდებობაზე ლაშა ზარგინავას ან ირინა ყურუას კანდიდატურას სთავაზობდნენ, თუმცა მათი პოზიცია ხელმძღვანელობამ არ გაითვალისწინა.

6 მარტს დროებით უფლებამოსილება შეუჩერეს ჟურნალისტ თეობა ბაკურიძეს. დირექტორის შესაბამის ბრძანებაში აღნიშნულია, რომ ტელეწამყვანი საინფორმაციო სამსახურის ახალ უფროსზე "ახდენდა ფსიქოლოგიურ ზეწოლას და აიძულებდა აბაზაძეს განცხადების საფუძველზე დაეტოვებინა მისი პოზიცია".

13 მარტს კი ბაკურიძე დირექტორმა სამსახურიდან გაათავისუფლა და მიზეზად შინაგანაწესის უხეში დარღვევა დასახელა. ჟურნალისტი მიიჩნევს, რომ მენეჯმენტის ეს გადაწყვეტილება უსამართლოა და აპირებს ამ თემაზე დავა გააგრძელოს. სასამართლოში თეონა ბაკურიძის და აჭარის ტელევიზიის სხვა ჟურნალისტების უფლებებს EMC დაიცავს. ბაკურიძე ამჟამად TV პირველის ჟურნალისტია.

ამავე თემაზე: