რუის-ურბნისის ეპარქიის მიტროპოლიტი იობი ყინწვისის მამათა მონასტრის სასულიერო პირის მიერ მკვლელობის მცდელობაზე ამბობს, რომ თავად, როგორც ეპარქიის მმართველმა, ამაზე პასუხი არ უნდა აგოს.

"რისთვის [უნდა შემიჩერდეს მე უფლებამოსილება] მე რა დავაშავე? რას ვფარველობ? არავითარ შემთხვევაში, არავის ვფარველობ. ნასვამ მდგომარეობაში, ნასვამმა არც ერისკაცი იცის და არც სასულიერო პირი. მათ ჩხუბი არ ჰქონიათ. იმ დღეს მამა საბა შესარიგებლად იყო ჩამოსული, პატარა კონფლიქტი ჰქონდათ მანამდე, ესეც ნასვამობასთან დაკავშირებით. არაფერი გასროლა, ჰაერში გაისროლეს შეჩერების მიზნით. რას მოხვდა [ტყვია], არ ვიცი, ეგ უნდა გამოიძიოთ თქვენ", — უთხრა იობმა ჟურნალისტებს.

მიტროპოლიტის თქმითვე, მამა დავითს, რომელმაც ბრალდებულია, ყველაზე მკაცრად ექცეოდა ეპარქიაში.

"ყველაზე მეტი აკრძალვა აქვს მღვდელმოქმედების. [...] თავის დროზე ვიშვილე [მამა დავითი] და მერე აღარ, ნასვამ მდგომარეობაში რომ ვნახე, მეც არ მომეწონა", — ამბობს მეუფე იობი და განმარტავს რომ ერისკაცებს შორის მოხდა ჩხუბი.

ჟურნალისტის კითხვაზე, ერისკაცების დაპირისპირებასთან რა შუაში იყო სასულიერო პირების სროლა, იობმა უპასუხა, რომ ნასვამ მდგომარეობაში ადამიანს განსჯის უნარი არ აქვს: "მამა საბამ ამაზე გააკეთა განცხადება და მამა დავითიც იტყვის, ალბათ, როცა გამოვა [ციხიდან]".

ყინწვისის მამათა მონასტრის სასულიერო პირი განზრახ მკვლელობის მცდელობის ბრალდებით 27 აპრილს დააკავეს. შინაგან საქმეთა სამინისტროს ცნობით, ბრალდებულმა, გორის რაიონის სოფელ რიეთის საავტომობილო გზაზე გადაადგილებისას, სავარაუდოდ, ავტომატური ცეცხლსასროლი იარაღიდან ცეცხლი გაუხსნა დაზარალებულის მართვის ქვეშ მყოფ ავტომანქანას, რის შემდგომაც შემთხვევის ადგილიდან მიიმალა.

მათივე ცნობით, მომხდარზე გამოძიება სისხლის სამართლის კოდექსის 19-108-ე მუხლით და 236-ე მუხლის მე-3 და მე-4 ნაწილებით გრძელდება, რაც განზრახ მკვლელობის მცდელობასა და ცეცხლსასროლი იარაღის უკანონო შეძენა-შენახვას გულისხმობს. დანაშაული 7-დან 15 წლამდე ვადით თავისუფლების აღკვეთას ითვალისწინებს.

სასამართლომ სასულიერო პირს აღკვეთის ღონისძიების სახით პატიმრობა 29 აპრილს შეუფარდა. 30 აპრილს რუის-ურბნისის ეპარქიამ განცხადებაა გაავრცელა და უარყო, რომ ბრალდებული მამა დავითი ყინწვისის მამათა მონასტრის წინამძღვარია. მათი განცხადებით, ეს ინციდენტი მათ ეპარქიაში არ მომხდარა.

მედიაში გავრცელებული ინფორმაციით, ყინწვისის მონასტერში მოღვაწე მამა დავითმა ყინწვისის კეთილგონიერი ავაზაკის მონასტრის წინამძღვარი, არქიმანდრიტი საბა ჟღენტი დაჭრა. თავად არქიმანდრიტი საბა ჟღენტი უარყოფდა, რომ იგი სასულიერო პირმა დაჭრა. მისი თქმით, დაჭრასთან დაკავშირებით ცრუ ინფორმაცია გავრცელდა და ამით "გულნატკენია".