ოკუპანტების მიერ დაკავებული, ხურვალეთში მცხოვრები დათა ვანიშვილის, იგივე დათა პაპას შვილიშვილი და რძალი გაათავისუფლეს. მალხაზ კურტაევისა და თათია ადიკაშვილის გათავისუფლების შესახებ ცნობა On.ge-ს სახელმწიფო უსაფრთხოების სამსახურში დადუდასტურეს:

"ცხელი ხაზით მიღებული ინფორმაციით, აღნიშნული პირების მიმართ დაწესებული უკანონო შეზღუდვები მოხსნილია".

როგორც რადიო თავისუფლება წერს, დაკავებულის დამ, თამთა ადიკაშვილმა განაცხადა, რომ ოჯახს გათავისუფლების სანაცვლოდ ჯარიმა არ გადაუხდია:

"ჯარიმა არ გადაგვიხდია. ორკვირიანი ვადა გავიდა კარანტინის და გამოუშვეს. ახლა სახლში არიან დათა პაპასთან ოკუპირებულ მხარეს, აქეთ ვერ გადმოვლენ. თუ გადმოვლენ, უკან ვეღარ დაბრუნდებიან, შემდეგ უკვე პატიმრობა ემუქრებათ. ვიცით, რომ ორივე კარგადაა".

საოკუპაციო რეჟიმის წარმომადგენლებმა დათა ვანიშვილის ოჯახის წევრები 15-16 აპრილს დაკავეს.

"პატარა გოგოა, ტირილ-ტირილით წაიყვანეს. ექვსნი მაინც იქნებოდნენ, რუსები, სახლში შემოვიდნენ და აქედან გაიყვანეს", — ამბობს დათა პაპა ამერიკის ხმასთან ინტერვიუში.

დათა პაპა ოკუპირებული ხურვალეთის ის მკვიდრია, ვინც ყველაზე აქტიურად ეკონტაქტება საერთაშორისო ვიზიტორებს. ის არ აღიარებს, დე ფაქტო რესპუბლიკას და აცხადებს, რომ საქართველოს მოქალაქეა და არ აპირებს საკუთარი სახლი დათმოს.