ჯანდაცვის მსოფლიო ორგანიზაციის გადაუდებელი პროგრამების აღმასრულებელმა დირექტორმა, მაიკ რაიანმა განაცხადა, რომ შეზღუდვების შემცირების შემდეგ შვედეთი მსოფლიოსთვის "მოდელი" უნდა გახდეს იმისა, თუ როგორ შეიძლება ვებრძოლოთ კორონავირუსს მინიმალური აკრძალვებით.

"ვფიქრობ, თუ სიტუაციის ნორმალიზებას მივაღწევთ, შვედეთი მრავალი თვალსაზრისით მომავლის მოდელს წარმოადგენს — თუ ისეთ საზოგადოებაში დაბრუნება გვსურს, სადაც იზოლაცია არ გვქონდა", — განაცხადა რაიანმა.

მისივე თქმით, შვედეთის ჯანდაცვის სისტემამ სწორი ნაბიჯები გადადგა:

"ისინი აკეთებდნენ ტესტირებას. მათ გაზარდეს სამედიცინო სფეროს უნარიანობა და ჯანდაცვის სისტემას ყოველთვის რჩებოდა იმის შესაძლებლობა, რომ იმ შემთხვევების რაოდენობას გამკლავებოდა, რომელიც მათ ჰქოდათ" — განაცხადა რაიანმა.

"ის, რაც ამ ქვეყანამ განსხვავებულად გააკეთა არის, რომ ის ძალიან ენდობა მოქალაქეებს, მათ უნარს, რომ საკუთარი ნებით შეძლონ თვითრეგულირება და დაიცვან სოციალური დისტანცია", — ამბობს ის.

შვედეთმა პანდემიასთან საბრძოლველად ევროპული ქვეყნებისაგან განსხვავებული გზა აირჩია. მაშინ, როცა ევროკავშირის მასშტაბით ქვეყნებმა კორონავირუსის პანდემიასთან საბრძოლველად კარანტინის მკაცრი ზომები შემოიღეს, ჩაკეტეს საზღვრები, დახურეს ბევრი ბიზნესი, შვედეთში მაღაზიები, რესტორნები, ბარები და სკოლები კვლავ ღიაა. ქვეყანას არც საზღვრები ჩაუკეტავს.

"ჩვენ მომავალში ვანხავთ, რამდენად სწორი გამოდგა ეს მიდგომა", — ამბობს მაიკლი.

ბოლო მონაცემებით, შვედეთში კორონავირუსით ინფიცირების 21 092 შემთხვევაა დაფიქსირებული, მათ შორის გარდაცვლილია 2 586 და გამოჯანრთელებულია 1 005 ადამიანი.

განახლება: დაზუსტდა, რომ მაიკ რაიანი შვედეთს სამომავლო მოდელად განიხილავს, როგორც ქვეყანას, რომელსაც ვირუსთან მინიმალური აკრძალვებით ბრძოლის გამოცდილება აქვს. ის ამბობს, რომ ამ გაგებით, შვედეთისგან მსოფლიოს ბევრი რამ ექნება სასწავლი.

ამის შემდეგ მცირე ცვლილებები შევიდა ტექსტში, შეიცვალა სტატიის სათაურიც. პირვანდელი ვერსია იყო: შვედეთის კორონავირუსთან ბრძოლის სტრატეგია მსოფლიოსთვის მოდელი უნდა იყოს — ჯანდაცვის მსოფლიო ორგანიზაცია

წაიკითხეთ: