განზარა მკვლელობის მცდელობის ბრალდებით დაკავებული ყინწვისის მამათა მონასტრის წინამძღვრის ადვოკატი, ბექა ნემსიწვერიძე აცხადებს, რომ მისი დაცვის ქვეშ მყოფს მეორე სასულიერო პირისთვის არ უსვრია და გასროლა ვიღაც პირის მიერ გაურკვეველ ვითარებაში განხორციელდა.

ადვოკატის მტკიცებით, მისი დაცვის ქვეშ მყოფს ცეცხლსასროლი იარაღი არც ჰქონია და არც გამოძიების მიერ არის ამოღებული.

უფლებამცველის ინფორმაციით, დაზარალებული ამ ინციდიდენტამდე სასულიერო პირებს შორის რამე კონფლიქტსა და დაკავებული მამა დავითის ამ დანაშაულთან შემხებლობას უარყოფს.

ადვოკატის ცნობით, საქმეში მხოლოდ 1 მოწმეა, რომელიც ამბობს, რომ, სავარაუდოდ, გასროლა შეიძლება განეხორციელებინა მამა დავითს, თუმცა მისი ჩვენება სხვა გამოკითხული პირების ჩვენებასთან წინააღმდეგობაში მოდის.

"ადგილი ჰქონდა რაღაც ინციდენტს, გაურკვეველ ვითარებაში მამა საბას მანქანის მიმართ ვიღაც პირის მიერ განხორციელდა სროლა. თუმცა, საქმეში არსებული არცერთი მტკიცებულება არ მიუთითებს მამა დავითის არა მხოლოდ ბრალეულობაზე, არ მიუთითებს ასევე იმ ვერსიაზეც, რომელსაც ავრცელებს ბრალდების მხარე — თითქოს მათ შორის მანამდე მონასტერში მოხდა დაპირისპირება. ყველა გამოკითხული პირი აღნიშნულს უარყოფს", — განაცხადა ბექა ნემსიწვერიძემ.

ყინწვისის მამათა მონასტრის სასულიერო პირი განზრახ მკვლელობის მცდელობის ბრალდებით 27 აპრილს დააკავეს. შინაგან საქმეთა სამინისტროს ცნობით, ბრალდებულმა, გორის რაიონის სოფელ რიეთის საავტომობილო გზაზე გადაადგილებისას, სავარაუდოდ, ავტომატური ცეცხლსასროლი იარაღიდან ცეცხლი გაუხსნა დაზარალებულის მართვის ქვეშ მყოფ ავტომანქანას, რის შემდგომაც შემთხვევის ადგილიდან მიიმალა.

მათივე ცნობით, მომხდარზე გამოძიება სისხლის სამართლის კოდექსის 19-108-ე მუხლით და 236-ე მუხლის მე-3 და მე-4 ნაწილებით გრძელდება, რაც განზრახ მკვლელობის მცდელობასა და ცეცხლსასროლი იარაღის უკანონო შეძენა-შენახვას გულისხმობს და 7-დან 15 წლამდე ვადით თავისუფლების აღკვეთას ითვალისწინებს.

მედიაში გავრცელებული ინფორმაციით, ყინწვისის მონასტრის წინმძღვარმა, მამა დავითმა ყინწვისის კეთილგონიერი ავაზაკის წინამღვარი, არქიმანდრიტი საბა ჟღენტი დაჭრა.

თავად არქიმანდრიტი საბა ჟღენტი უარყოფდა, რომ იგი სასულიერო პირმა დაჭრა. მისი თქმით, დაჭრასთან დაკავშირებით ცრუ ინფორმაცია გავრცელდა და ამით "გულნატკენია".

რუის-ურბნისის ეპარქიაში სასულიერო პირის დაჭრას ეპარქიის მიტროპოლიტი იობი უარყოფდა.