თბილისის მერი, კახა კალაძე ამბობს, რომ ყოფილი მთავარ პროკურორს, ოთარ ფარცხალაძეს, სავარაუდოდ, მანქანით გადაადგილების საშვი არ ექნებოდა.

მისივე თქმით, თუ ფარცხალაძე უსაშვოდ გადაადგილდებოდა, მაშინ, როცა ქვეყანაში მსუბუქი ავტომობილით გადაადგილება აკრძალული იყო, უნდა დაჯარიმდეს.

"მე არ მაქვს ინფორმაცია მას ჰქონდა თუ არა ამის უფლება და საშუალება. თუ არ ჰქონდა და სავარაუდოდ, არ ექნებოდა, არ ვიცი, ვერ გეტყვით, მაშინ, რა თქმა უნდა, უნდა დაჯარიმდეს", — განაცხადა კალაძემ.

25 აპრილს, როცა ქვეყანაში მსუბუქი ავტომობილით გადაადგილება აკრძალული იყო, ნაციონალური მოძრაობის წევრმა, ლევან ხაბეიშვილმა გაავრცელა ვიდეო და ფოტო და აცხადებდა, რომ ყოფილი პროკურორი ოთარ ფარცხალაძე ქალაქში მანქანით თავისუფლად გადაადგილდებოდა.

აღნიშნული ინფორმაციას ამ დრომდე არც შინაგან საქმეთა სამინისტრო და არც მთავრობა არ გამოხმაურებია.