შვედეთის მთავარი ეპიდემიოლოგი, ანდერს ტეგნელი, რომელმაც კორონავირუსთან ბრძოლა ჯოგური იმუნიტეტით გადაწყვიტა, ამბობს, რომ ქვეყანა კორონავირუსის მეორე ტალღას უკეთესად მომზადებული შეხვდება. ამის შესახებ ინფორმაციას CNN ავრცელებს.

როგორც ეპიდემიოლოგი ამბობს, შვედეთში კორონავირუსი უკვე იმდენ ადამიანს გამოუვლინდა, რომ მომდევნო ტალღისთვის ქვეყანა უკეთეს მდგომარეობაში იქნება.

მისი თქმით, ვირუსთან ბრძოლის შვედეთისეულმა სტრატეგიამ რამდენიმე ასპექტში იმუშავა.

"ჩვენმა ჯანდაცვის სისტემამ ვირუსთან გამკლავება შეძლო და ეს გამოჩნდა იმაშიც, რომ ინტენსიური თერაპიის საწოლების მინიმუმ 20% თავისუფალი იყო და შეეძლოთ კოვიდინფიცირებულებზე ეზრუნათ", — განაცხადა ტეგნელმა.

ეპიდემიოლოგმა კვლავ გაუსვა ხაზი იმას, რომ შვედეთის დედაქალაქში, სტოკჰოლმში ჯოგური იმუნიტეტის დონე მოსახლეობაში 15-20%-ია, რაც, მისი თქმით, ვირუსის მეორე ტალღას შეანელებს.

თუმცა, აღნიშნა, რომ მხოლოდ იმუნიტეტი საკმარისი არ იქნება, რადგან დაავადების იმუნიტეტის შესახებ ჯერ კიდევ ბევრი რამაა უცნობი.

რაც შეეხება შვედეთში სიკვდილიანობის მაჩვენებელს, ტეგნელის თქმით, ამ ეტაპზე რთულია იმაზე პასუხის გაცემა იქნებოდა თუ არა სხვა მაჩვენებელი, თუ ქვეყანა ვირუსითან ბრძოლის განსხვავებულ ტაქტიკას აირჩევდა.

როგორც ის ამბობს, სიკვდილიანობის 50% ხანდაზმულთა სახლებში დაფიქსირდა.

შვედეთმა პანდემიასთან საბრძოლველად ევროპული ქვეყნებისაგან განსხვავებული გზა აირჩია. მაშინ, როცა ევროკავშირის მასშტაბით ქვეყნებმა კორონავირუსის პანდემიასთან საბრძოლველად კარანტინის მკაცრი ზომები შემოიღეს, ჩაკეტეს საზღვრები, დახურეს ბევრი ბიზნესი, შვედეთში მაღაზიები, რესტორნები, ბარები და სკოლები კვლავ ღიაა. ქვეყანას არც საზღვრები ჩაუკეტავს.

ბოლო მონაცემებით, შვედეთში კორონავირუსით ინფიცირების 16 755 შემთხვევაა დაფიქსირებული, მათ შორის გარდაცვლილია 2 021 და გამოჯანრთელებულია 550 ადამიანი.