ქუთათელ-გაენათელი მიტროპოლიტი განმარტავს, რომ სასაფლაოზე გასვლას არა 21, არამედ 28 აპრილს გეგმავს, როცა დაწესებული შეზღუდვა მოხსნილი იქნება.

მისი თქმით, საეკლესიო ტრადიციით, ეკლესია პანაშვიდებს არა ბრწყინვალე შვიდეულში, არამედ კვირაცხოვლობის სამშაბათს იხდის და სწორედ ამ დღეს გულისხმობდა, როცა საფლავზე გასვლის დროზე საუბრობდა.

"ის, რომ საქართველოში დამკვიდრებულია ტრადიცია აღდგომის შემდეგ ორშაბათს გასვლა, ეს ადგილობრივი ხალხური მოვლენაა და რადგან ხელისუფლებამ დაადგინა რეგულაცია, რომ 21 რიცხვის ჩათვლით, ანუ ხვალ და ზეგ თავი შეიკავონ სასაფლაოზე გასვლისგან, ეს არ ეწინააღმდეგება საეკლესიო კანონებს. ეს ეხება კვირაცხოვლობის მომდევნო სამშაბათს, 28 აპრილს", — განაცხადა მეუფე იოანემ.

აღნიშნულ განმარტებამდე სასულიერო პირმა სააღდგომო ქადაგებისას თქვა, რომ 21 აპრილს სასაფლაოებზე გასვლასა და პანაშვიდის გადახდას აპირებდა.

"რაღაც შეზღუდვა დააწესა ხელისუფლებამ ჩვენი ზრუნვის გამო, რომ ჩვენ რამე არ დაგვემართოს. ორშაბათს მკაცრი რეგულაციები დააწესა და თქვა, რომ 21-მდე იქნება. 21 სწორედ სამშაბათია. ასე რომ სამშაბათს ჩვენ დიდ პანაშვიდს გადავიხდით ტაძარში, მოვიხსენებთ ჩვენს წინაპრებს. მივულოცავთ მათ ქრისტეს აღდგომას და იმ დღეს მე მგონი ხელისუფლება ხელს აღარ შეგვიშლის, რომ საფლავებზე გავიდეთ", — აცხადებდა მეუფე იოანე.

საგანგებო მდგომარეობის ფარგლებში დაწესებული ახალი შეზღუდვებით, ქვეყნის მასშტაბით სასაფლაოები 17 აპრილიდან 10 დღით დაიკეტა. მთავრობის განცხადებით, აკრძალვა არ ეხება მხოლოდ მიცვალებულის დაკრძალვასთან დაკავშირებული ღონისძიებების განხორციელების მიზნით სასაფლაოს ტერიტორიაზე შესვლასა და გადაადგილებას.