პარტია ახალი საქართველოს ლიდერი, გიორგი ვაშაძის თქმით, მთავრობის წევრების განცხადება, რომ სააღდგომო ლიტურგიას თვალს დისტანციურად მიადევნებენ, "პილატეს მსგავსად ხელების დაბანაა".

მისი თქმით, მთავრობამ ნათლად უნდა განუმარტოს საზოგადოებას თუ რას აპირებენ აღდგომის დღესასწაულთან დაკავშირებით.

"ახლოვდება აღდგომის დღესასწაული, ხელისუფლება კი ამ მნიშვნელოვან და გადამწყვეტ მომენტში კვლავ დაიმალა. გავიგეთ, რომ თქვენ და მთავრობის სხვა წევრები ტელევიზორის ეკრანიდან აპირებთ ამ ყველაფრისთვის თვალის მიდევნებას, მაგრამ შექმნილ ვითარებაში ეს ვერ იქნება პასუხისმგებლიანი ხელისუფლების არჩევანი, ეს უფრო პილატეს მსგავსი ხელის დაბანის და შორიდან ყურების არჩევანია, რაც დანაშაულის ტოლფასია", — განაცხადა ვაშაძემ.

როგორც ვაშაძე ამბობს, ნებისმიერი ფორმის დისკრიმინაცია და ორმაგი სტანდარტი სახელმწიფოს ფუნდამენტს, კანონის უზენაესობასა და კონსტიტუციურ წესრიგს არღვევს.

"ახლა პოლიტიკის კეთებისა და პოლიტიკური დივიდენდების მიღების დრო არ არის. მოიქცეთ ისე, როგორც სახელმწიფოს თუნდაც ფორმალურ მმართველს შეეფერება და ფორმალურად მაინც აიღეთ პასუხისმგებლობა შექნილ კრიზისულ ვითარებაზე. ბატონო გახარია, გამოდით, საზოგადოება ელოდება თქვენს გადაწყვეტილებებსა და მითითებს", — განაცხადა ვაშაძემ.