მართლმადიდებელი ეკლესიის კათოლიკოს პატრიარქმა 12 აპრილს, ბზობის წირვის ბოლოს ქადაგებისას თქვა, რომ როცა "უფალი განსაცდელს გვაძლევს, თუ მადლობით მივიღებთ, ძალას მოგვცემს რომ გადავიტანოთ". საგანგემო მდგომარეობისა და ვირუსის გავრცელების რისკის მიუხედავად, ტაძარში ათეულობით ადამიანი იყო შეკრებილი. პატრიარქმა ილია მეორემ მათ მიმართა, რომ ღმერთი აძლევთ ძალას, რომ შეხვდნენ განსაცდელს.

"არ ველოდი, რომ ქართველი ხალხი ასე მშვიდად და ვაჟკაცურად შეხვდებოდა ამ განსაცდელებს. ღმერთი გვაძლევს ჩვენ ძალას. ბზობა ეს დიდებული დღესასწაულია. მე ვიტყოდი, ეს არის ადამიანის გამოცდა ადამიანის განწმენდა. როცა ჩვენ ვხვდებით ასეთ განსაცდელებს, როგორიც ახლა არის, ჩვენ უნდა გვახსოვდეს, რომ უფალი რომელიც გვაძლევს განსაცდელს, თუ ჩვენ მადლიერებით, მადლობით მივიღებთ ამას, უფალი ძალას მოგვცემს რომ გადავიტანოთ.

ისიც უნდა გვახსოვდეს, რომ განსაცდელის შემდეგ მოდის სიხარული. ღმერთი მოწყალეა, ღმერთი მოგვცემს ჩვენ სიხარულს, და ძალას, რომ ავიტანოთ ეს განსაცდელი. გილოცავთ ამ დღესასწაულს, გილოცავთ ამ გამოცდას, გილოცავთ განწმენდას. ეს არის ჩვენი განწმენდა. მაგრად იდექით. აი სხვები ლაპარაკობენ უცხოეთში ქართველმა ხალხმაო ვაჟკაცურად მიიღოო ეს განსაცდელი. სხვების ლაპარაკი არ გვჭირდება, ჩვენ ვიცით. ქართველი ადამიანი ძლიერია სულით".