ბერლინი-თბილისისა და ამსტერდამი-თბილისის მიმართულებით დამატებითი ფრენები შესრულდება. ამის შესახებ ინფორმაციას საგარეო საქმეთა სამინისტრო ავრცელებს. მათი ინფორმაციით, აღნიშნული გადაწყვეტილება უწყებათაშორის საკოორდინაციო საბჭოზე დღეს, 2 აპრილს მიიღეს.

მათივე ცნობით, ბერლინი-თბილისის მიმართულებით დამატებითი რეისი 12 აპრილს შესრულდება, ამსტერდამი-თბილისის — 14 აპრილს.

"აღნიშნული ფრენები, ისევე როგორც საკოორდინაციო საბჭოს მიერ განსაზღვრული სხვა ავიარეისები, განხორციელდება ჯანდაცვის მსოფლიო ორგანიზაციის პროტოკოლით, რაც ითვალისწინებს მგზავრთა ჭადრაკული პრინციპით განთავსებას, თითოეულ ბორტზე არაუმეტეს 120 მგზავრისა. ბილეთის ფასი განსაზღვრულია 199 ევროს ოდენობით", — ნათქვამია საგარეო საქმეთა სამინისტროს განცხადებაში.

როგორც ცნობილია, საკოორდინაციო საბჭოს მიერ ევროპიდან საქართველოს მიმართულებით ავიარეისები 26 მარტიდან 10 აპრილის ჩათვლით განისაზღვრა. მათივე გადაწყვეტილებით, ავიარეისებს კომპანია ჯორჯიან ეარვეისი ახორციელებს.

2 აპრილს საქართველოში კორონავირუსით ინფიცირებულთა რიცხვი 13-ით გაიზარდა და ჯამში 130-მდე შეადგინა. მათ შორის 26 პირი უკვე გამოჯანმრთელდა. კარანტინის რეჟიმში 5550 ადამიანი რჩება, ხოლო სტაციონარში მეთვალყურეობის ქვეშ — 281.

საქართველოში საგანგებო მდგომარეობის პირობები 30 მარტს გამკაცრდა. პრემიერმინისტრმა თქვა, რომ "ფაქტობრივად კარანტინს" აცხადებენ, რომელიც 31 მარტის 8 საათიდან ამოქმედდა და ასევე "ფაქტობრივ კომენდანტის საათს" ითვალისწინებს.