ახალი საქართველოს ლიდერი, გიორგი ვაშაძე მთავრობას კორონავირუსზე აგრესიული შეტევის სტრატეგიას სთავაზობს. როგორც ვაშაძე ამბობს, მსოფლიოს კორონავირუსთან ბრძოლის რამდენიმეთვიანმა გამოცდილებამ აჩვენა, რომ ვირუსთან ბრძოლაში უცდომელად კლასიკური ომის სტრატეგიები და ტაქტიკები მუშაობს.

ვაშაძის თქმით, დღემდე მთავრობა ვირუსის შეკავების და შედეგებზე რეაგირების ტაქტიკას იყენებს იმ დაშვებით, რომ შესაბამისი რაოდენობის ინფრასტრუქტურა არ აქვს. მისივე თქმით, პირველ რიგში საჭირო რაოდენობის სწრაფი დიაგნოსტიკის საშუალებებია.

"კორონავირუსთან ბრძოლის სტრატეგიის დაგეგმვის სწრაფი და მასობრივი დიაგნოსტიკის საშუალებების არაპრიორიტეტულმა, მეორეხარისხოვან მიმართულებად აღიარებამ ბრმად დაგვტოვა ვირუსის გამოვლენასა და პრევენციის მიმართულებით, რაც დიდ შეცდომად მიგვაჩნია. სწორედ ამ დაშვებული შეცდომების შედეგია, მთავრობის დღეს არსებული ე.წ. შეკავების ანუ შედეგზე რეაგირების ტაქტიკა, რადგან ვერ ვახდენთ ვირუსის დროულ, მასობრივ დიაგნოსტიკასა და გამოვლენას. სწორედ ამ დაშვებულ შეცდომათა ერთობლიობამ მიგვიყვანა საგანგებო მდგომარეობის გამოცხადებამდე, ეკონომიკურ კრიზისამდე, რამაც ჯანმრთელობის საფრთხესთან ერთად შიმშილის საფრთხის წინაშე დააყენა ჩვენი მოქალაქეები", — განაცხადა ვაშაძემ.

ვაშაძის თქმით, მათი სტრატეგიის რეალიზების შემთხვევაში, 12 აპრილს ყოველგვარი კარანტინის მოხსნაა შესაძელებელი. მისივე განმარტებით, ყველაფერი სწრაფ და აგრესიულ დიაგნოსტიკას ეფუძნება.

"სამუშაოების ნაწილი, რომელიც 3 მნიშვნელოვან კომპონენტს შეიცავს: საჭიროა გაიდლაინებისა და რეკომენდაციების შემუშავება სამედიცინო სექტორისთვის, პირველადი ჯანდაცვის, ანუ ოჯახის ექიმების ამბულატორიების, პოლიკლინიკების მომზადება თავიდან ბოლომდე ამ აგრესიული შეტევისთვის და პროგრამული უზრუნველყოფის ნაწილი, რომელიც აუცილებლად გვჭირდება, რომ აგრესიულ შეტევაზე გადავიდეთ. ხოლო მეორე ნაწილი ეს არის, თარიღების მიხედვით გაწერილი აქტივობები", — განაცხადა ვაშაძემ.