ჯანდაცვის მინისტრის მოადგილის, თამარ გაბუნიას განცხადებით, სახელმწიფო რჩება იმ აზრზე, რომ ინდივიდუალური სურვილის საფუძველზე კომერციული ტესტირება გამართლებული პრაქტიკა არ არის. მისი თქმით, ეპიდემიის დროს ტესტირების კომერციალიზაცია არაეთიკურია, მაგრამ ეს კერძო მიმწოდებლების პროცესში მონაწილეობას არ გამორიცხავს.

"ჩვენ რომ თავისუფლად, გარკვეული კომერციული ინტერესებისთვის მოქალაქეებს ვუთხრათ, რომ არის ტესტის ჩატარების შესაძლებლობა, მიდით, გადაიხადეთ გარკვეული თანხა და თქვენ მიიღებთ ტესტის პასუხს, ეს არ არის სწორი მიდგომა. ამ შემთხვევაში მნიშვნელოვანია ერთიანი ცენტრალიზებული ჩარჩო, როგორც ხარისხის კონტროლისთვის, ასევე, პასუხების ინტერპრეტაციისთვის, ასევე შემდეგი ქმედებისთვის, რომელიც უნდა ჯდებოდეს ერთიანი კლინიკური მართვის პროტოკოლის ფარგლებში ისევე, როგორც დიაგნოსტიკური ალგორითმის ფარგლებში", — განაცხადა მან TV პირველის ეთერში.

ამ საკითხზე დღეს ისაუბრა ჯანდაცვის მინისტრმა, ეკატერინე ტიკარაძემაც. On.ge-ს კითხვის პასუხად მან განაცხადა, რომ სახელმწიფო ტესტების კომერციალიზაციას ეწინააღმდეგება, რადგან ასეთ დროს არავინ უნდა ისარგებლოს ადამიანების მდგომარეობით. თუმცა, მანვე აღნიშნა, რომ სამედიცინო რეგულირების საანგეტოში სწრაფი ტესტების შემოტანის ნებართვა 8 კომპანიამ ითხოვა და 4-მა უფლება მიიღო. მისი თქმით, კერძო სექტორში კომერციული ტესტების ფასს სახელმწიფო დაარეგულირებს.

"ის საკითხი, რომ ჩვენ ვეწინააღდეგებით კომერციალიზაციას, არის იმის საპასუხოდ, რომ დღევანდელ მდგომარეობაში, არცერთ უწყებას, ისევე, როგორც კერძო სექტორს, არ აქვს უფლება, ნახოს მოგება ჩვენს ადამიანებზე, რომლებსაც აქვთ ასეთი გამოწვევა. ჩვენ ვეწინააღმდეგებით იმ კომერციული ფასების დადგენას ამ კომპანიებისას, რომელიც იყო უკვე დაფიქსირებული.

აქედან გამომდინარეთ, ჩვენ მივიღეთ გადაწყვეტილება, რომ მოხდება თანხის ფიქსირება და გარკვეულ შემთხვევებში და უმეტესწილად ეს თანხები იქნება გადახდილი სახელმწიფოს მხრიდან, როდესაც იქნება ექიმის დამადასტურებელი ჩვენება ტესტირების ჩასატარებლად", — განაცხადა მან.

ბოლო რამდენიმე დღეა სწრაფი ტესტების საკითხი პოლიტიკური სპეკულაციებისა და კრიტიკის საგანი გახდა. ოპოზიციაში აცხადებენ, რომ სახელმწიფოს აქამდე უნდა ეზრუნა სწრაფი ტესტების შემოტანაზე და ეს მოსახლეობის უფრო ფართოდ ტესტირებას შეუწყობდა ხელს.

პრემიერ-მინისტრ გიორგი გახარია კი ამბობდა, რომ სწრაფი ტესტები პოლიტიკური ინსტრუმენტია ზოგიერთი "უპასუხისმგებლო პოლიტიკოსის", რომელსაც წარმოდგენა არ აქვს, ამ სწრაფ ტესტს, შემდგომ განვითარების რა ეტაპები უნდა მოჰყვეს. მისივე განმარტებით, სწრაფი ტესტები პანაცეა არაა.