პრემიერ-მინისტრ, გიორგი გახარიას თქმით, შეწყალების პოლიტიკური ფასი აღიარებაა. ამის შესახებ გახარიამ ღამის კურიერში გიგი უგულავაზე საუბრისას განაცხადა. მისივე თქმით, შეუძლებელია,რომ ნორმალურად მომუშავე სასამართლო სისტემაში ვინმეს "პოლიტიკური ფასის გადახდის" გარეშე შეწყალების ამბიცია ჰქონდეს.

როგორც გახარიამ თქვა, დღეს საქართველოში პოლიტიკური მართლმსაჯულება და პოლიტპატიმარი არ არსებობს.

"ვიღაც ამბობს, რომ თეორიულად ვიღაც უნდა გათავისუფლდეს, მაშინ, როდესაც ქვეყანაში არსებობს სასამართლო, როდესაც სასამართლო ინსტანციები გავლილია, როდესაც პროცესი სრულად პოლიტიზირებულია, ვიღაცამ ვიღაც უნდა შეიწყალოს. თუ რეალურ პოლიტიკურ პროცესზე ვლაპარაკობთ, ყველა ასეთი შეწყალებას თავისი პოლიტიკური ფასი აქვს და ეს პოლიტიკური ფასი ძაან მარტივია — აღიარებაა, მეტი არაფერი... რა თქმა უნდა, ყველაფერს თავისი ფასი აქვს, ბუნება სიცარიელეს ვერ იტანს", — განაცხადა გახარიამ.

ევროპული საქართველოს ლიდერის, გიგი უგულავას, შეწყალების თხოვნით ადვოკატმა პრეზიდენტს მიმართა. გიგი უგულავას ადვოკატის, ბექა ბასილაიას თქმით, ქვეყანაში სიტუაციის საბოლოო განმუხტვას სჭირდება იმ პირების გათავისუფლება, რომელთაც ოპოზიცია და საზოგადოების ნაწილი პოლიტიკურ პატიმრებად მიიჩნევს.

მას შემდეგ, რაც ევროპული საქართველოს ლიდერი გიგი უგულავა დააკავეს ხელისუფლებასა და ოპოზიციას შორის საარჩევნო სისტემაზე მოლაპარაკებები შეწყდა. ოპოზიცია უარს ამბობდა პოლიტიკური ლიდერების გათავისუფლების გარეშე მოლაპარაკებების გაგრძელებაზე, ხელისუფლება კი მათ პოლიტპატიმრებად არ აღიარებდა. უგულავამ ციხიდან წერილი გამოგზავნა და განაცხადა, რომ არ სურს მისი გათავისუფლების საკითხი გახდეს ბარიერი მაქსიმალურად პროპორციული სისტემის მიღების პროცესში.

საქმეში დიპლომატიური კორპუსის ჩართვის შემდეგ ოპოზიციამ და ხელისუფლებამ საარჩევნო სისტემაზე შეთანხმებას მიაღწია, თუმცა დაკავებული ოპოზიციონერების საკითხის გარეშე. მათ მოაწერეს ხელი ერთობლივ დოკუმენტს მართმსაჯულების სისტემის შესახებ, რომელშიც წერია, რომ "აუცილებელია რეაგირება ქმედებებზე, რომლებიც შესაძლოა აღქმულ იქნეს, როგორც სასამართლო და საარჩევნო პროცესების არასათანადო პოლიტიზაცია და მომავალში მსგავსი ქმედებები თავიდან უნდა იქნეს აცილებული". ხელისუფლების წარმომადგენლები აცხადებდნენ, რომ დაკავებული ოპოზიციონერების გათავისუფლება შეთანხმების ნაწილი არ ყოფილა.

ოპოზიციამ ერთიანი განცხადება გაავრცელა და მოუწოდა პრეზიდენტსა და სხვა შესაბამის უწყებებს, რომ გამოიყენონ მათ ხელთ არსებული ლეგიტიმური მექანიზმები და ხელი შეუწყონ გიგი უგულავას, გიორგი რურუას, ირაკლი ოქრუაშვილისა და ბესიკ თამლიანის გათავისუფლებას. საქართველოს პრეზიდენტმა განაცხადა, რომ შეწყალების საქმეს თუ მიიღებს, განიხილავს და გადაწყვეტს შეწყალების აქტი გამოსცეს, თუ არა.