პარლამენტმა საკონსტიტუციო ცვლილებების განხილვისთვის საყოველთაო სახალხო კომისიის შექმნას მხარი დაუჭირა. კომისიის შემადგენლობა, დღეს, 17 მარტს პარლამენტის პლენარულ სხდომაზე 114 ხმით დაამტკიცეს. კენჭისყრაში მონაწილეობისთვის, ოპოზიციის წევრებმა ბოიკოტი ერთი დღით დაარღვიეს, თუმცა კენჭის ყრის შემდეგ სხდომათა დარბაზი დატოვეს.

დადგენილების მიხედვით კომისია 9 წევრისგან შედგება და მათ შორის არიან: პარლამენტის თავმჯდომარე არჩილ თალაკვაძე (კომისიის თავმჯდომარე), საპარლამენტო უმრავლესობის ლიდერი მამუკა მდინარაძე, საპარლამენტო უმრავლესობის წევრი ირაკლი კობახიძე, ნაციონალური მოძრაობის წევრი თინა ბოკუჩავა, ევროპული საქართველოს წევრი სერგი კაპანაძე, პატრიოტთა ალიანსის წევრი ირმა ინაშვილი, ფრაქცია დამოუკიდებელი დეპუტატების თავმჯდომარე მარიამ ჯაში, პარლამენტის თავმჯდომარის მრჩეველი თენგიზ შარმანაშვილი, პარლამენტის თავმჯდომარის მრჩეველი და კომისიის მდივანი თორნიკე ჭეიშვილი.

როდის და რა ფორმატში დაიწყებს კომისია საყოველთაო სახალხო განხილვებს ჯერჯერობით არ კონკრეტდება. თუმცა კორონავირუსის გამო შესაძლოა, რომ განხილვა დისტანციურად მოხდეს.

8 მარტს ოპოზიცია და მმართველი გუნდი საპარლამენტო არჩევნების 120/30-ზე სისტემით ჩატარებაზე შეთანხმდნენ. რაც იმას გულისხმობს, რომ 2020 წლის არჩევნებში პროპორციული სიით 120 დეპუტატი აირჩევა, მაჟორიტარულით კი — 30.

გაიგეთ მეტი: