"რატომ თქვა მან რომ რესპუბლიკური პარტია მას და პრეზიდენტის ინსტიტუტს ებრძოდა, რომ კვირიკაშვილის გარდა ვერავინ ვერ იპოვა სამეგობროდ საქართველოს პოლიტიკაში, ეს მე არ ვიცი, ეს არის უმადურობა ადამიანურ დონეზე და პოლიტიკურ დონეზე უმეცრება"- ეს განცხადება რესპუბლიკური პარტიის წევრმა ლევან ბერძენიშვილმა პრეზიდენტის გუშინდელ გამოსვლასთან დაკავშირებით გააკეთა.

ბერძენიშვილის თქმით, პრეზიდენტს მეტი პასუხისმგებლობა მართებს, როდესაც პოლიტიკურ პარტიაზე ლაპარაკობს:

"რა უკარნახა და ვინ უკარნახა არ ვიცი, მრჩევლად ჰყავს ბატონი ხუხაშვილი და ეტყობა, ამაშია მთელი საქმე".

მისივე თქმით, რესპუბლიკური პარტია და დავით უსუფაშვილი ყველაფერს აკეთებდნენ, რომ პრეზიდენტის ინსტიტუტი გადარჩენილიყო:

"არავის სხვა ქვეყანაში არ გვიცხოვრია და ყველა ვხედავდით, ვინ ეხმარებოდა და ვინ - არა"

ლევან ბერძენიშვილი ასევე აღნიშნავს, რომ როდესაც პირველად მივიდა პარლამენტში პრეზიდენტი, რესპუბლიკელი მინისტრები დასხდნენ მის მოსასმენად:

"მიუხედავად ამ განცხადებებისა, ჩვენ ვაპირებთ კვლავ პატივი ვცეთ მას, შეიძლება პირადად მის მიმართ მადლიერების გრძნობა არ გვქონდეს, მაგრამ ინსტიტუტია ეს და ჩვენ ყოველთვის ვიცავთ ამ ინსტიტუტს".

გიორგი მარგველაშვილმა, 10 მაისს, პრესკონფერენციაზე დეპუტატ თამაზ მეჭიაურსა და რესპუბლიკელებს შორის არსებული დაპირისპირების საკითხზე დასმულ კითხვაზე განაცხადა, რომ აღნიშნული პარტიებისა და ფრაქციების წარმომადგენლებს შორის მისთვის განსხვავება არ არის.

პრეზიდენტის თქმით, ისინი უნისონში საუბრობდნენ პრეზიდენტის ინსტიტუტის შესუსტებასა და პრეზიდენტის მმართველობის დისკრედიტაციის თაობაზე:

"ეს ის პოლიტიკური გუნდია, რომელიც პრინციპულად მიპირისპირდებოდა როდესაც საუბარი იყო პრეზიდენტის ინსტიტუტის პატივისცემაზე".