ეროვნული უსაფრთხოების საბჭოს გადაწყვეტილებით ქვეყანაში საგანგებო მდგომარეობის გამოცხადების აუცილებლობა არ დგას. ამის შესახებ დღეს, 16 მარტს გამართულ ეროვნული უსაფრთხოების საბჭოს სხდომაზე იმსეჯელეს, რომელიც პრემიერ-მინისტრი გიორგი გახარია ხელმძღვანელობით გაიმართა.

მთავრობის ადმინისტრაციის ცნობით, საბჭოს სხდომაზე ეროვნული უსაფრთხოების ჭრილში განიხილეს ქვეყანაში ახალი კორონავირუსის გავრცელების ფონზე შექმნილი ვითარება. მათივე ცნობით, განსაკუთრებული ყურადღება დაეთმო ეკონომიკური უსაფრთხოების კუთხით არსებულ რისკებსა და გამოწვევებს მოკლე და გრძელვადიან პერსპექტივებში.

ასევე, ადმინისტრაციის ინფორმაციით, საბჭოს სხდომაზე აღინიშნა, საქართველოს მთავრობა პირველივე დღიდან მიჰყვება კონკრეტულ სამოქმედო გეგმას და გადაწყვეტილებებს მოვლენების განვითარების შესაბამისად მიიღებს.