ბილ გეიტსი, Microsoft-ის დამფუძნებელი და ყოფილი დირექტორი, კომპანიის სამეთვალყურეო საბჭოს ტოვებს. მან დირექტორის თანამდებობა 2008 წელს დატოვა, რათა მეტი დრო დაეთმო ბილ და მელინდა გეიტსების საქველმოქმედო ფონდისათვის. 2014 წელს კი სამეთვალყურეო საბჭოს თავმჯდომარეობიდან გადადგა.

მილიარდერმა პრესრელიზში განაცხადა, რომ ფილანტროპულ საქმიანობაზე კონცეტრირება სურს. გეიტსი კვლავაც დარჩება ამჟამინდელი დირექტორის, სატია ნადელას მრჩევლად ტექნოლოგიურ საკითხებში.

"ჩემთვის პატივი იყო, წლების განმავლობაში მემუშავა ბილის გვერდით და მესწავლა მისგან. ბილმა კომპანია იმ რწმენით დააარსა, რომ ტექნოლოგიების დემოკრატიზაცია აუცილებელია და სწორედ ამ გზით შეიძლება თანამედროვე ცივილიზაციის ყველაზე რთული პრობლემების გადაჭრა. ამ მიზანმა თვითონ კომპანიაც შეცვალა და მსოფლიოც. უზომოდ მადლიერი ვარ იმის გამო, რომ ბილის მეგობარი ვარ", - განაცხადა დირექტორმა სატია ნადელამ.

მიუხედავად იმისა, რომ გეიტსი სრულად არ ამბობს უარს მის მიერ დაარსებულ კომპანიაზე, ეს გადაწყვეტილება მაინც 45-წლიანი ეპოქის დასასრულს ჰგავს.