საპარლამენტო უმრავლესობის წევრი, ირაკლი კობახიძე ამბობს, რომ 2020 წლის არჩევნებში ქართული ოცნება "სულ მცირე" 2016 წლის არჩევნების შედეგს გაიმეორებს და 90 მანდატს მაინც მოიპოვებს. მისი თქმით, შემდეგ პარლამენტში ქართულ ოცნებას მყარი უმრავლესობა და მყარი მთავრობის ჩამოყალიბების საშუალება ექნება.

"ჩვენ ვართ დარწმუნებული, რომ მყარი უმრავლესობით მოვალთ შემდეგ პარლამენტში და ვფიქრობ, რომ სადღაც 90 მანდატის აღება არ გაგვიჭირდება. ეს არის ჩვენი პროგნოზი, რაც ეფუძნება, ბუნებრივია, საზოგადოების განწყობის კვლევას და ვითარების საერთო შეფასებას", — განაცხადა კობახიძემ პალიტრანიუსის ეთერში.

Edison Research-ის კვლევის მიხედვით, კითხვაზე: დღეს რომ საპარლამენტო არჩევნები იყოს, რომელ პოლიტიკურ პარტიას ან პარტიათა ბლოკს მისცემდით ხმას გამოკითხულთა 53% პასუხობს, რომ ძირითადი ოპოზიციური პარტიების გაერთიანებას, ხოლო 40% — ქართულ ოცნებას.

8 მარტს ოპოზიცია და მმართველი გუნდი საპარლამენტო არჩევნების 120/30-ზე სისტემით ჩატარებაზე შეთანხმდნენ. რაც იმას გულისხმობს, რომ 2020 წლის არჩევნებში პროპორციული სიით 120 დეპუტატი აირჩევა, მაჟორიტარულით კი — 30.