კერძო დაცვის კომპანია ალგანის დაცვისა და ტექნიკური აღჭურვილობის სამსახურის უფროსმა როლანდ მინაძემ On.ge-ს განუცხადა, მათი თანამშრომელი, რომელმაც 5 ნოემბერს ძაღლს ჯოხით სცემა, სამსახურიდან გათავისუფლებულია. მინაძის თქმით, აღნიშნული გადაწყვეტილების მიზეზი ის გახდა, რომ სამართალდამცავებმა საქმეზე ადმინისტრაციული სამართალდარღვევის კოდექსით ოქმი შეადგინეს. თუ რა გადაწყვეტილებას მიიღებს კომპანია საბოლოო ჯამში და გამოძიების დასრულების შემდეგ, დააბრუნებენ თუ არა აღნიშნულ თანამშრომელს სამსახურში, მინაძე ამბობს ამ საკითხზე ალგანში პასუხს ხვალ გაგვცემენ.

საქმეში გარკვევას დაგვპირდა ალგანის ცოცხალი ძალის უფროსი, ზვიად მურმანიშვილიც, რომელიც პასუხისმგებელია თანამშრომელთა გათავისუფლებაზე. მისი თქმით, ამ დროისათვის ის ქალაქგარეთ იმყოფება და საქმის დეტალებს არ იცნობს.

თვითმხილველმა ანა აბაკელიამ ფეისბუკზე 5 ნოემბერს ატვირთა ვიდეო, სადაც ჩანს, მამაკაცი ჯოხით როგორ უსწორდება მაღაზიის შესასვლელში მოკალათებულ უპატრონო ძაღლს. სწორედ აღნიშნული მამაკაცია ალგანის თანამშრომელი.

როგორც ვიდეოს ავტორი წერს, 5 ნოემბერს პირადად შეესწრო ვარკეთილში, სუპერმარკეტ GL-თან, მაღაზიის დაცვის თანამშრომელი ჯოხით როგორ სცემდა ძაღლს. ანა აბაკელიამ ვიდეოს გადაღება მოახერხა, რის შემდეგაც თბილისის მერიის ცხოველთა მონიტორინგის სამსახურს დაურეკა. აბაკელიას თქმით, ძაღლის მიმართ გამოსარჩლებამ გამოიწვია სიტუაციის დაძაბვა მაღაზიის თანამშრომლებს, მასსა და ცხოველთა მონიტორინგის სამსახურის წარმომადგენლებს შორის, რის შემდეგაც აუცილებელი გახდა საპატრულო პოლიცია, რომელმაც ცხოველისადმი სასტიკი მოპყრობის ფაქტზე გამოძიება დაიწყო.