ნაციონალური მოძრაობის წევრი, რომან გოცირიძე ამბობს, რომ ქართული ოცნება მაჟორიტარული ოლქების საკუთარ თავზე მორგებას ცდილობს. მისი თქმით, ქართული ოცნების მიერ წარმოდგენილი ოლქების გადანაწილება საბოლოო არაა და მასზე პარტიები ერთად შეთანხმდებიან.

"ღვინის ქურდები გაგვიგონია, ხმის ქურდებიც გვინახავს, მაგრამ ოლქის ქურდებიც თუ გამოჩნდებოდნენ არ გვეგონა. თბილისში უნდათ, რომ მოიპარონ 1 ოლქი, უნდათ, რომ დიდი თბილისი გაყონ 7 ოლქად, ნაცვლად იმისა, რომ იყოს 8 ოლქი", — განაცხადა გოცირიძემ.

8 მარტს ოპოზიცია და მმართველი გუნდი საპარლამენტო არჩევნების 120/30-ზე სისტემით ჩატარებაზე შეთანხმდნენ. რაც იმას გულისხმობს, რომ 2020 წლის არჩევნებში პროპორციული სიით 120 დეპუტატი აირჩევა, მაჟორიტარულით კი — 30.

საპარლამენტო უმრავლესობის წევრის, ირაკლი კობახიძის თქმით, 2020 წლის არჩევნებისთვის 30 მაჟორიტარული ოლქის გადანაწილების მონახაზი უკვე შემუშავებული აქვთ. მისი თქმით, ზოგიერთი ოლქის შემთხვევაში 4-5 მუნიციპალიტეტი გაერთიანდება. კობახიძის ინფორმაციით, მაჟორიტარული ოლქიდან 18 აღმოსავლეთ საქართველოში იქნება, 12 — დასავლეთში. როგორც კობახიძე ამბობს, თბილისში 7 მაჟორიტარული ოლქი იქნება, ქუთაისში, ბათუმსა და რუსთავში თითო-თითო ოლქი.