აჭარის ტელევიზიის ჟურნალისტების მხარდასაჭერად ზუგდიდსა და ქუთაისში აქცია გაიმართა. აქციაზე შეკრებილი სამოქალაქო აქტივისტები და ჟურნალისტები ამბობენ, რომ მიუღებელია ის, რაც დღეს აჭარის საზოგადოებრივ მაუწყებელში ხდება. მათი აზრით, ეს არის ზეწოლა თავისუფალ და კრიტიკულ მედიაზე.

"დღეს გამოვედით, რათა სოლიდარობა გამოვუცხადოთ ჩვენს კოლეგებს აჭარის ტელევიზიიდან. ჩვენი სათქმელი ფურცლებზე გადმოვიტანეთ — თავისუფალი მედია შეზღუდვების გარეშე. ჩვენ ვამბობთ, რომ ეს არ არის მხოლოდ აჭარის ტელევიზიის პრობლემა", — თქვა თამარ ზანთარიამ TV პირველთან საუბრისას.

აქციის მონაწილეებს თან ჰქონდათ პლაკატები წარწერით "ჩემი თავისუფლება დღეს აჭარის ტელევიზიიის თავისუფლებაზე გადის". ჟურნალისტმა ირაკლი ვაჩიბერიძემ მედიასთან საუბრისას აღნიშნა, რომ რაც მეტად მოჭიმავ ზამბარას, მეტი სიძლიერით მოგხვდება ცხვირში — ეს ფიზიკის კანონი გავრცელდება აჭარის ტელევიზიაზეც.

"ჩვენ მოვითხოვთ შეწყდეს ზეწოლა აჭარის საზოგადოებრივი ტელევიზიის მებრძოლ გუნდზე და ეს ბრძოლა დარჩეს წინააღმდეგობად საბჭოური მეთოდების არ დამკვიდრებისთვის და არა ადამიანებს შორის წინააღმდეგობად", — თქვა მზეკო ხაჩიძემ TV პირველთან საუბრისას.

გუშინ, 6 მარტს, ცნობილი გახდა, რომ აჭარის მაუწყებლის ტელეწამყვანს, თეონა ბაკურიძეს უფლებამოსილება შეუჩერეს. ეს ფაქტი ჟურნალისტების ნაწილმა აქციით გააპროტესტა. თეონა ბაკურიძე თვლის, რომ გადაწყვეტილება უსამართლოა და ის სამართლებრივი დავის დაწყებას აპირებს.

აჭარის მაუწყებელში განვითარებულ მოვლენებს წინ უსწრებდა მაუწყებლის დირექტორის, გიორგი კოხრეიძის მიერ დაწყებული რეორგანიზაცია. მან უფლებამოსილება შეუმცირა თავის მოადგილეს, ნათია ზოიძეს, რომელსაც ამ მიზეზით არხიდან წასვლა მოუწია. გარდა ამისა, აღარ გაუგრძელა საინფორმაციო სამსახურის ერთ პროდიუსერს კონტრაქტი, ხოლო მეორეს — მთავარი გამოშვების პროდიუსერს, თანამდებობა გაუუქმა.

4 მარტს კი აჭარის მაუწყებლის საინფორმაციო სამსახურის უფროსის მოვალეობის შემსრულებლად დაინიშნა გიორგი აბაზაძე, რომელიც სოციალურ ქსელებში ჰომოფობიური და სექსისტური შინაარსის გზავნილებით გამოირჩეოდა. ჟურნალისტების განცხადებით, მისი შერჩევის პროცესი გაუმჭვირვალე იყო. მათი თქმით, დირექტორს, აღნიშნულ თანამდებობაზე, ლაშა ზარგინავას ან ირინა ყურუას კანდიდატურას სთავაზობდნენ, თუმცა ეს არ გაითვალისწინეს.

გაიგეთ მეტი: