აჭარის მაუწყებლის თანამშრომლების ნაწილი ეთერიდან ტელეწამყვანი თეონა ბაკურიძის მოხსნას აპროტესტებენ. ისინი ევროპის მოედანზე არიან შეკრებილები. აქციის მონაწილეები ამბობენ, რომ ბაკურიძისთვის უფლებამოსილების შეჩერება მორიგი სიგნალია.

"ჟურნალისტებთან ომი ამ ქვეყანაში არავის მოუგია", — განაცხადა გადაცემა ჰეშთეგის წამყვანმა, მალხაზ რეხვიაშვილმა.

აჭარის მაუწყებლის ტელეწამყვანი თეონა ბაკურიძე 9 მარტიდან მთავარ საინფორმაციო გამოშვებას ვეღარ წაიყვანს. დირექტორის მიერ ხელმოწერილ დოკუმენტში აღნიშნულია, რომ 6 მარტს, როცა საინფორმაციო სამსახურის ახალი უფროსი, გიორგი აბაზაძე დღის გეგმის დაწერას იწყებდა, ბაკურიძის მხრიდან ადგილი ჰქონდა დაუმორჩილებლობას და "ახდენდა ფსიქოლოგიურ ზეწოლას და აიძულებდა აბაზაძეს განცხადების საფუძველზე დაეტოვებინა მისი პოზიცია". გარდა ამისა, აღნიშნულთან დაკავშირებით დაწყებულია მოკვლევა.

თეონა ბაკურიძე ამბობს, რომ მისთვის უფლებამოსილების შეჩერებას სამართლებრივი საფუძვლები არ ჰქონდა.

აჭარის მაუწყებელში განვითარებულ მოვლენებს წინ უსწრებდა მაუწყებლის დირექტორის, გიორგი კოხრეიძის მიერ დაწყებული რეორგანიზაცია. მან უფლებამოსილება შეუმცირა თავის მოადგილეს, ნათია ზოიძეს, რომელსაც ამ მიზეზით არხიდან წასვლა მოუწია. გარდა ამისა, აღარ გაუგრძელა საინფორმაციო სამსახურის ერთ პროდიუსერს კონტრაქტი, ხოლო მეორეს — მთავარი გამოშვების პროდიუსერს, თანამდებობა გაუუქმა.

4 მარტს კი აჭარის მაუწყებლის საინფორმაციო სამსახურის უფროსის მოვალეობის შემსრულებლად დაინიშნა გიორგი აბაზაძე, რომელიც სოციალურ ქსელებში ჰომოფობიური და სექსისტური შინაარსის გზავნილებით გამოირჩეოდა. ჟურნალისტების განცხადებით, მისი შერჩევის პროცესი გაუმჭვირვალე იყო. მათი თქმით, დირექტორს, აღნიშნულ თანამდებობაზე, ლაშა ზარგინავას ან ირინა ყურუას კანდიდატურას სთავაზობდნენ, თუმცა ეს არ გაითვალისწინეს.