არასამთავრობო ორგანიზაციები მიიჩნევენ, რომ სამართალდამცავ უწყებებს ადამიანების ფარული მიყურადება გარე კონტროლის მექანიზმის გარეშე არ უნდა შეეძლოთ. NGO-ების აზრით, ფარულ ჩანაწერებთან დაკავშირებით მიმდინარე გამოძიება, ჯერჯერობით, წინ არ მიდის, ხოლო იმ შემთხვევაში, თუ ისინი სახელმწიფოს მხრიდან ეფექტურ რეაგირებას ვერ დაინახავენ, შესაძლოა კამპანიამ ეს შენ გეხება პოლიტიკური პირების პასუხისმგებლობის საკითხიც დააყენოს. ამ საკითხთან დაკავშირებით კამპანიაში ჩართულმა არასამთავრობოებმა ფონდ ღია საზოგადოება-საქართველოს ოფისში დახურული შეხვედრა დღეს, 28 მარტს, გამართეს.

"ჩვენ ვფიქრობთ, რომ გასაღები არ უნდა იყოს მხოლოდ და მხოლოდ სამართალდამცავი უწყებების ხელში. მთავარი არის, რომ მათ არ უნდა შეეძლოთ ვინმეს მოსმენა გარე კონტროლის გარეშე. ყოველთვის უნდა იყოს მეორე, ან მესამე პირი, რომელიც მათ გააკონტროლებს", - განაცხადა საერთაშორისო გამჭვირვალობის დირექტორმა ეკა გიგაურმა.

NGO-ები მიიჩნევენ, რომ არსებული სიტუაციიდან გამოსავალი მხოლოდ სანქციის დამძიმება ვერ იქნება და ის აუცილებლად აისახოს პრაქტიკაში. მათი თქმით, ამ პროცესში ინფორმაციის დაზუსტების მიზნით მნიშვნელოვანია იმ დეპუტატების დაკითხვა, რომლებიც ბოლო დღეებში ფარულ ჩანაწერებთან დაკავშირებით კომენტარებს აკეთებენ.

CIDA-ს დირექტორის, ზვიად დევდარიანის თქმით, NGO-ები ამ ეტაპზე საკანონმდებლო ინიციატივაზე მუშაობენ, რომელიც სახელმწიფოს მინიმალურ შესაძლებლობას მისცემს, რომ შემდგომში უკანონო მიყურადებას ჰქონდეს ადგილი. მისი განმარტებით, ინიციატივაზე მუშაობის დასრულებისთანავე ისინი მას სხვადასხვა პოლიტიკურ პარტიებს წარუდგენენ.

ახალგაზრდა იურისტთა ასოციაციის თავჯდომარე, ანა ნაცვლიშვილი მიიჩნევს, რომ ამ ეტაპზე საზოგადოება კვლავ ინფორმაციულ ვაკუუმშია და არ იცის, მიაღწია თუ არა პროკურატურამ რაიმე მნიშვნელოვან პროგრესს და თუ არსებობს რაიმე კონკრეტული სტრატეგიული გეგმა, რომელიც შემდგომი კადრების გავრცელების პრევენციას უზრუნველყოფდა. მისი თქმით, ზემოაღნიშნული ბადებს კითხვას, რამდენად ეფექტიანად ებრძვის ხელისუფლება შექმნილ პრობლემას და რამდენად ადეკვატურად აქვს მას ის საფრთხე გააზრებული, რომელიც უკავშირდება ფარულ ჩანაწერებს:

"საკანონმდებლო დონეზე აღმოსაფხვრელია ის ხარვეზები, რომლებიც კვლავ უტოვებს შსს-ს და უსაფრთხოების სამსახურს შესაძლებლობას, რომ აწარმოონ უკანონო მოსმენები/ჩაწერები ყოველგვარი კონტროლის გარეშე. პრაქტიკაში უნდა შედგეს პრეცედენტები, რომ ამ ტიპის დანაშაულის როგორც შემკვეთები, ისე შემსრულებლები უნდა დაისაჯონ. თუ დასჯის პრეცენდენტები არ იქნება, არ აქვს მნიშვნელობა, რა ეწერება კანონში".

11 მარტს გავრცელდა, სავარაუდოდ, ერთ-ერთი ქართველი პოლიტიკოსის პირადი ცხოვრების ამსახველი ვიდეო მასალა. 14 მარტს ამ ტიპის კიდევ ერთი ვიდეო მასალა გამოქვეყნდა, რომელშიც პირთა იდენტიფიცირება შეუძლებელია, რადგან მათი სახეები დაფარულია. ვიდეოს ავტორები ემუქრებიან კონკრეტულ პოლიტიკოსებსა და ჟურნალისტებს, რომ მათი პირადი ცხოვრების ამსახველ ჩანაწერებს კიდევ გაავრცელებენ, თუ 31 მარტამდე თავიანთ საქმიანობას არ შეწყვეტენ.

საპარლამენტო უმრავლესობის წევრმა თამაზ მეჭიაურმა ფარული ჩანაწერების გავრცელებასთან დაკავშირებით განაცხადა, რომ "თანამდებობის პირებმა, რომლებზეც მაკომპრომატირებელი ჩანაწერი არსებობს, თანამდებობები უნდა დატოვონ". უმრავლესობის კიდევ ერთმა წევრმა დავით ლორთქიფანიძემ კი, პირდაპირ ეთერში გადაცემის წამყვანს ინგა გრიგოლიას მიმართა ირონიული ფრაზით, პირადი ცხოვრების ამსახველ კადრებთან დაკავშირებით.