აჭარის საზოგადოებრივი მაუწყებლის დირექტორის ახალი მოადგილე, ვახო ხუზმიაშვილი, დღეს მაუწყებელში პირველად მივიდა და თანამშრომლებს შეხვდა. როგორც შეხვედრისას ხუზმიაშვილმა თანამშრომლებს უთხრა, ის მხარს უჭერს ჟურნალისტებს და თუ სარედაქციო პოლიტიკაში ჩარევას დაინახავს, ტელევიზიიდან პირველი თავად წავა.

"მართალი სიტყვა რომ ისმოდეს ამ ტელევიზიიდან და კრიტილული სიტყვა რომ ისმოდეს, იმის მხარეს ვიქნები. ერთადერთი ვიცი, რომ სიტუაცია რაღაცნაირად უნდა დარეგულირდეს და ჟურნალისტები არ იყვნენ სტრესულ გარემოში. მე აბსოლუტარად მხარს ვუჭერ ჟურნალისტებს, მე თუ აქ დავინახავ სარედაქციო ჩარევას, ჟურნალისტების გვერდზე ვიქნები. არც ხელფასი მიღირს, არც არაფერი, პირველი მე წავალ ამ ტელევიზიიდან, თუ მე აქ ვნახავ, რომ ვინმე შინაარსობრივ მხარეში ერევა", — განაცხადა ვახო ხუზმიაშვილმა.

აჭარის ტელევიზიაში დირექტორის პირველი მოადგილედ ნათია ზოიძის ნაცვლად ვახო ხუზმიაშვილი 21 თებერვალს აირჩიეს. ის კომისიამ დახურულ სხდომაზე შეარჩია.

აჭარის მაუწყებელში ქართული ოცნების მიერ დაკომპლექტებული მრჩევლებისგან არჩეული გიორგი კოხრეიძის მისვლის შემდეგ თანამშრომელთა ეჭვები გამართლდა. არხის დირექტორის პირველ მოადგილეს, ნათია ზოიძეს უფლებები შეუზღუდეს, რის გამოც მან თანამდებობა დატოვა. მოგვიანებით დაანონსდა, რომ შეიცვლებოდა მთავარი საინფორმაციო გამოშვების პროდიუსერი და პროტესტის მიუხედავად დირექტორმა, კვლავ ქართული ოცნებისგან დანიშნული მრჩევლების დახმარებით, მაია მერკვილაძეს სხვა თანამდებობა შესთავაზა.

გარდა ამისა, დისციპლინური წარმოება მიმდინარეობს საინფორმაციო სამსახურის უფროსის, შორენა ღლონტის, წინააღმდეგ. ამ მოვლენების გამო, ტელევიზია პროტესტის ნიშნად დატოვა ჟურნალისტმა, ნინო ხოზრევანიძემ.