ანას ბაღთან მიმდინარე მშენებელი კომპანიის წარმომადგენელი, გიორგი ბენაშვილი აცხადებს, რომ აქტივისტების მიერ პარტიზანულად მოწყობილი სკვერი "სოროსის დაფინანსებულია". მისი თქმით, ანას ბაღის მცველებს სკვერის ბედი არ ადარდებთ და პოლიტიკური ბრძოლა მიმდინარეობს, რათა თბილისის მერია "მონსტრად გამოიყვანონ".

როგორც სამშენებლო კომპანიის წარმომადგენელი ამბობს, სამშენებლო სამუშაოებისთვის ხელის შეშლას ნაციონალური მოძრაობის და ევროპული საქართველოს წარმომადგენლები ცდილობენ.

"აღნიშნული ტერიტორია არის ჩვენს საკუთრებაში, მერიის გენერალურმა ინსპექციამაც დაადასტურა. გამოიძახეს და გადაამოწმეს საბუთები. დემონტაჟი მოხდა იმიტომ, რომ ეს იყო ყოველგვარი თვითნებურად, თავხედურად, ხულიგნურად და ყოველგვარი კანონდარღვევით სახელდახელოდ მოწყობილი სკვერი, რათა სამშენებლო სამუშაოებში შეეშალათ ხელი. ჩვენ დაუზიანებლად მოვხსენით მათი ნივთები", — განაცხადა გიორგი ბენაშვილმა.

22 თებერვალს ადგილობრივი მოსახლეობამ, რომელიც რამდენიმე თვეა ანას ბაღის გადასარჩენად იბრძვის, აქტივისტებთან ერთად სკვერი პარტიზანულად გააშენეს. მათ ასფალტის საფარი დაამტვრიეს და მცენარეები დარგეს. დღეს, 24 თებერვალს სამშენებლო კომპანიის წარმომადგენლებმა პარტიზანულად მოწყობილი სკვერი დაშალეს და ტერიტორია შემოღობეს.

ანას ბაღის დასაცავად მოსახლეობა აქციას რამდენიმე თვეა მართავს. მათ უნდათ, რომ 10 სართულიანი კორპუსი არ აშენდეს, რადგან პარკის არსებობას საფრთხის წინაშე აყენებს.