თავდაცვის მინისტრი ირაკლი ღარიბაშვილი არ პასუხობს კითხვას იმის შესახებ, თუ რას აკეთებს სახელმწიფო არჩილ ტატუნაშვილის მკვლელების დასასჯელად. წილკანში ტატუნაშვილის ორიწლისთავზე ყოფნისას ეს კითხვა მას მთავარი არხის ჟურნალისტმა დაუსვა, რაზეც ღარიბაშვილმა განაცხადა:

"მე ვარ თავდაცვის მინისტრი და დიდი მადლობა".

ამ კითხვას არც მთავარობის მეთაურმა, გიორგი გახარიამ უპასუხა. ღარიბაშილისგან განსხვავებით, მან კითხვას თავი აარიდა და მანქანაში ჩაჯდა. თუმცა, მანამდე მან აღნიშნა, რომ ტატუნაშვილის საქციელი გმირობის უდიდესი მაგალითია, რომელიც მთელ ქვეყანას უნდა აერთიანებდეს.

არჩილ ტატუნაშვილის გარდაცვალებიდან დღეს ორი 2 წელი გავიდა. ის 2018 წლის 22 თებერვალს საოკუპაციო რეჟიმმა ახალგორში უკანონოდ დააკავა, რის შემდეგაც ცხინვალის იზოლატორში მოკვდა. ექსპერტიზამ დაადგინა, რომ ტატუნაშვილს სიცოცხლისთვის შესაუბამო მრავლობითი დაზიანებები აღენიშნებოდა. მისი წამების ბრალდებით, საოკუპაციო რეჟიმის წარმომადგენლებზე, დავით გურწიევსა და ალიკ ტაბოევზე ინტერპოლით ძებნაა გამოცხადებული.

სახელმწიფომ ტატუნაშვილის გარდაცვალებაზე პასუხისმგებლობა რუსეთს დააკისრა და იუსტიციის სამინისტრომ ქვეყნის წინააღმდეგ სტრასბურგის სასამართლოში სარჩელი შეიტანა. შინაგან საქმეთა მინისტრის მაშინდელი მოადგილე, ამჟამად კი პრემიერის მოადგილე კახა საბანაძე აცხადებდა, რომ ტატუნაშვილის მკვლელების კანონის სრული სიმკაცრით დასასჯელად ყველაფერს გააკეთბდნენ.

არჩილ ტატუნაშვილის ცხედარი ოკუპირებული ცხინვალიდან ერთი თვის შემდეგ გადმოასვენეს და 24 მარტს მუხათგვერდის ძმათა სასაფლაოზე სამხედრო პატივით დაკრძალეს. გარდაცვალების შემდეგ ის ღირსების ორდენით დაჯილდოვდა.