ქართული ოცნების დეპუტატმა დიმიტრი ხუნდაძემ ვანო მერაბიშვილის გათავისუფლებაზე საუბრისას თქვა, რომ წინა მთავრობის დროს ციხიდან გვამები გამოჰქონდათ. ამის შესახებ დიმიტრი ხუნდაძემ TV პირველის ეთერში ისაუბრა. ხუნდაძის თქმით, დღეს სხვაობა ნამდვილად შესამჩნევია, რადგან ვანო მერაბიშვილი კოსტუმში გამოწყობილი გამოვიდა მატროსოვის ციხიდან:

"ციხის კარი ზოგჯერ იკეტება, ზოგჯერ იღება კიდეც. ხედავთ, რომ ეს არაა დაკავშირებული საარჩევნო კალენდართან, როგორც ეს იყო ადრე. სხვაობასაც ხედავთ. ადრე ადამიანი ნაწამები გამოდიოდა, ზოგი ამასაც ვერ ახერხებდა, ყოველ 5 დღეში 3 გვამი გამოდიოდა სასჯელაღსრულების სისტემიდან, დღეს ხედავთ, რომ კოსტუმში გამოწყობილი გამოდის მერაბიშვილი და აკეთებს პოლიტიკურ განცხადებებს".

დღეს, 20 თებერვალს, პატიმრობიდან ახლად გათავისუფლებულმა ყოფილმა პრემიერმა, ვანო მერაბიშვილმა განაცხადა, რომ წლის ბოლომდე, ქართული ოცნების მმართველობა დასრულდება და მათი "დამხობის შემდეგ, აი, ამ ციხის [მატროსოვის] კარები ფართოდ გაიღება და ყველა პოლიტპატიმარი გათავისუფლდება".

ვანო მერაბიშვილის საქმე

ვანო მერაბიშვილის საქმეზე სტრასბურგის დიდმა პალატამ დაადგინა ევროკონვენციის მე-18 მუხლის დარღვევა, მე-5 მუხლთან ერთად.

"სასამართლომ დაასკვნა, რომ მერაბიშვილის წინასწარი პატიმრობა მისი ქართული პოლიტიკიდან ჩამოშორებას არ ისახავდა მიზნად. მიუხედავად ამისა, სასამართლომ დაადგინა, რომ მისი ბრალდებები, რაც წინასწარი პატიმრობის პერიოდში შუაღამით ციხიდან გაყვანასა და დაკითხვას უკავშირდებოდა, საკმარისად დამაჯერებელი და დადასტურებულია", —ნათქვამია ევროსასამართლოს განცხადებაში.

სტრასბურგის სასამართლოს დიდმა პალატამ საქმის განხილვა საქართველოს საჩივრის საფუძველზე დაიწყო. იუსტიციის სამინისტრომ ვანო მერაბიშვილის საქმეზე ამავე სასამართლოს ერთ-ერთი პალატის 14 ივნისს გამოტანილი გადაწყვეტილება გაასაჩივრა. შესაბამისად, აღნიშნული ვერ შევიდა ძალაში აღსასრულებლად.

14 ივნისს, ევროპულმა სასამართლომ დაადგინა, რომ დაირღვა ადამიანის უფლებათა კონვენციის მე-18 მუხლი, მე-5 მუხლის პირველ ნაწილთან ერთად. მერაბიშვილის იმჟამინდელი ადვოკატი, ოთო კახიძე განმარტავდა, რომ კონვენციის მე-18 მუხლს მეხუთესთან ერთად ადგენენ მაშინ, როდესაც დისკრიმინაციული მოტივით ხდება პატიმრობის შეფარდება. კონვენციის მე-18 მუხლი უფლებების შეზღუდვათა გამოყენების ფარგლებს ეხება და ადგენს, რომ "ხსენებულ უფლებათა და თავისუფლებათა კონვენციით დაშვებული შეზღუდვები გამოიყენება მხოლოდ და მხოლოდ მათთვის გათვალისწინებული მიზნებისათვის".