პარლამენტში იურიდიულ საკითხთა კომიტეტის თავმჯდომარე, ანრი ოხანაშვილი ამბობს, რომ ქართული ოცნების მიერ დაქირავებული ლობისტები სახელმწიფოს ინტერესებზე ზრუნავენ, ნაციონალური მოძრაობის კი პარტიულზე.

"მთავარი იცით რა არის?! ლობისტური ჯგუფები, რომლებიც ყავდა და ჰყავს ნაციონალურ მოძრაობას, ნაციონალური მოძრაობის ხელისუფლების პირობებში, ეს ლობისტური ჯგუფები სახელმწიფოს იმიჯზე და ინტერესებზე კი არ ზრუნავდნენ, ზრუნავდნენ პარტიულ ინტერესებზე. ჩვენ ლობისტურ ჯგუფებს ვქირაობთ და მათთან ვთანამშრომლობთ არა პარტიული ინტერესებისთვის, არამედ პირველ რიგში სახელმწიფოს ინტერესებისთვის", — თქვა ანრი ოხანაშვილმა.

დეპუტატის განმარტებით, აშშ-ში ლობისტური საქმიანობა დემოკრატიის შემადგენელი კომპონენტია და მმართველი გუნდი მას მაქსიმალურად ზუსტი, ობიექტური ინფორმაციის მისაწოდებლად იყენებს.

გუშინ, 13 თებერვალს ცნობილი გახდა, რომ ქართულმა ოცნება ამერიკულ ლობისტურ კომპანია DCI Group AZ, L.L.C.-ს თვეში $33 333-ს გადაუხდის. პარტიიდან დოკუმენტს ხელს აწერს აღმასრულებელი მდივანი, დეპუტატი ირაკლი კობახიძე. ამის შესახებ ინფორმაცია თავდაპირველად რადიო თავისუფლებამ გაავრცელა.

დოკუმენტში წერია, რომ კომპანიამ პარტია ქართული ოცნება უნდა წარმოაჩინოს, როგორც სანდრო, პრაგმატული, დასავლეთის ლიბერალური იდეალებისა და დემოკრატიის ერთგული პარტნიორი.