ლიტერატურული კონკურსი ალერდი 2016 დასრულდა. პროექტის ჟიურიმ I, II, III ადგილებზე გასული და ხალხის ფავორიტი ავტორები გუშინ გამოავლინა.

კონკურსის გამარჯვებული გახდა 21 წლის შიო ყანდორელაშვილი, ეროვნული თავდაცვის აკადემიის მეოთხე კურსის იუნკერი. როგორც შიომ On.ge-სთან გასაუბრებისას აღნიშნა, კონკურსში მონაწილეობა მეგობრის ინიციატივით გადაწყვიტა. პირველი რომანი მან 18-19 წლის ასაკში დაწერა, თუმცა ჯერ არც ერთი ნაშრომი არ გამოუქვეყნებია. ახლაც წერს და აპირებს, სამივე ნაშრომი ერთად გამოსცეს.

"დაახლოებით ნახევარ საათში დაწერილი მოთხრობაა. ძალიან გამიკვირდა, რომ გაიმარჯვა. უზომოდ გახარებული ვარ. მოთხრობა უმიზნოდ მოხეტიალე ადამიანზეა, რომელსაც საკმაოდ საინტერესო და, ცოტა არ იყოს, ბინძური ფილოსოფია აქვს. პირველი რომანი როკ მუსიკას და როკ-მუსიკოსს ეხება. მეორე - აზარტულად მოთამაშეებზეა. მესამე არის კრივზე და ორმოციანი წლების ჩიკაგოზე, ამერიკულ ცხოვრებაზე. ასეთი მრავალფეროვანი სტილით მინდა, რომ ვწერო და ჩემი ხასიათი მქონდეს ლიტერატურაში."

მეორე ადგილი დაიკავა ნინი მეტრეველმა, მოთხრობით ემოცია სამ მოქმედებად, ხოლო მესამეადგილოსანი დათო სიხარულიძე გახდა, მოთხრობით - ვალერი და იოსები.

ხალხის რჩეული გახდა ნინო ზაზაშვილი. მის მოთხრობას ყორანივით შავი ჰქვია.

ფოტო: On.ge

როგორც უკვე იცით, მონაწილეებისა და ჟიურის ვინაობა დაჯილდოების დღემდე ანონიმური იყო. აღმოჩნდა, რომ ჟიური პროფესიონალი და კომპეტენტური ადამიანებით იყო დაკომპლექტებული. კონკურსანტების ბედი მანანა ბეგიაშვილმა, ბიჭი ივანიშვილმა და გაგა ნახუცრიშვილმა გადაწყვიტეს.

ალერდი 2016 სხვა კონკურსებისგან გამოირჩეოდა იმით, რომ I,II,III ადგილების გარდა გამოვლინდა ხალხის რჩეულიც. ორგანიზატორებმა ესეც არ იკმარეს, სხვადასხვა ნომინაციებში გამარჯვებული 5 ახალგაზრდა გამოავლინეს და ბიბლუსის ვაუჩერებით დააჯილდოვეს:

  • ლიტერატურული ნოვაცია - შაკო დევდარიანი;
  • ნოსტალგია - ცოტნე ავსაჯანიშვილი - პიერო;
  • დებიუტი - მარიამ კავილაძე - რევოლუცია იქნება მალე;
  • ადამიანთა თანასწორობა - მარიამ ჭუმბურიძე - სამირა;
  • ჩვენ და ცხოველები - თემურ ზოიძე - მარტა.

როგორც კონკურსის ერთ-ერთი ორგანიზატორი საკო კოჭლამაზაშვილი ამბობს, "ყველაზე მთავარი მაინც ალერდის წიგნია, რომელშიც კონკურსის მონაწილე 25 საუკეთესო მოთხრობა შევიდა".

საკო კოჭლამაზაშვილი - იდეის ავტორი

ფოტო: On.ge

"ლიტერატურული კონკურსი ალერდი უკვე მეორედ ჩავატარეთ. წელს კონკურსის მასშტაბები კიდევ უფრო გაიზარდა და თბილისის უნივერსიტეტებს შეუერთდნენ გორის, ახალციხის, თელავისა და ბათუმის უნივესტიტეტები. მონაწილეობა მიიღეს იმ ქართველმა სტუდენტებმაც, რომლებიც სწავლობენ ჩინეთსა და ვილნიუსში.

როგორც პროექტის ავტორმა, შემიძლია ვთქვა, რომ ალერდი 2016 შედგა. ის თავის მიზანს ამართლებს და პროექტის წარმატებისათვის ეს არის ყველაზე მნიშვნელოვანი. წელს მივიღეთ უფრო ხარისხიანი ნამუშევრები, სტუდენტებიც უფრო მეტი ხალისით ჩაერთნენ. დროებით გემშვიდობებით, მაგრამ, იმედი მაქვს, სულ მალე გეტყვით, რომ ლიტერატურული კონკურსი ალერდი 2017 იწყება!"

კონკურსის ჟიური - ბიჭი ივანიშვილი, გაგა ნახუცრიშვილი და მანანა ბეგიაშვილი.

ფოტო: On.ge

"ეს იყო ერთ-ერთი ყველაზე რთული კონკურსი, რომელშიც მე მონაწილეობა მიმიღია, მაგრამ ვთვლი, რომ ასე თუ ისე გავართვი თავი ამ ამოცანას. იმდენად საინტერესო, იმდენად კარგი, იმდენად მრავალფეროვანი სამყარო გაქვთ, რომ ძალიან მიხარია თქვენთან ურთიერთობა. სწორედ ამიტომ დიდ მადლობას გიხდით. ასევე დიდ მადლობას ვუხდი ამ მშვენიერი კონკურსის ორგანიზატორებს." - თქვა ლიტერატურულ-შემოქმედებითი სახელოსნოს ხელმძღვანელმა და ავტორმა, მანანა ბეგიაშვილმა.

ფოტო: On.ge

კონკურსის მხარდამჭერი იყო On.ge-ც, რომელმაც საკუთარი ფავორიტი დაასახელა და დათო სიხარულიძეს 3-თვიანი სტაჟირების შესაძლებლობა მისცა.