ქართული ოცნების ყოფილი დეპუტატი, ზაქარია ქუცნაშვილი გარდაბნის თბოსადგურის დირექტორის მოადგილედ დაინიშნა. აღნიშნული ინფორმაცია On.ge-ს დაუდასტურა როგორც ქუცნაშვილმა, ასევე გარდაბნის თბოსადგურმაც.

შპს გარდაბნის თბოსადგურის 49,092%-იანი წილის მფლობელი სახელმწიფო საინვესტიციო ფონდი — საპარტნიორო ფონდია, 50,908%-იანი წილს კი საქართველოს ნავთობისა და გაზის კორპორაცია ფლობს.

საპარლამენტო უმრავლესობის ყოფილ წევრს, ზაქარია ქუცნაშვილს პარლამენტმა უფლებამოსილება სექტემბერში შეუჩერა. ამ თხოვნით თავად დეპუტატმა მიმართა საკანონმდებლო უწყებას.

დელემბერში ქუცნაშვილმა საქართველოს კომუნიკაციების ეროვნული კომისიის წევრობაც სცადა, თუმცა მთავრობამ უმრავლესობის ყოფილი წევრი კომუნიკაციების კომისიის წევრის შესარჩევი კონკურსისთვის დაიწუნა.

ქუცნაშვილმა მანდატის დატოვების შესახებ მას შემდეგ განაცხადა, რაც მისი ორგანიზებით გამართული ასამბლეის ფარგლებში რუსმა დეპუტატმა საქართველოს პარლამენტის შენობაში პარლამენტის თავმჯდომარის ადგილი დაიკავა. ეს ფაქტი გააპროტესტა ვიცე-სპიკერმა თამარ ჩუგოშვილმა და პრეზიდენტმა სალომე ზურაბიშვილმა. თავდაპირველად, უმრავლესობის წევრმა, ზაქარია ქუცნაშვილმა თქვა, რომ "სადღაც რუსს რომ დავინახავთ, არ უნდა გავნადგურდეთ", მოგვიანებით კი განმარტა, რომ "თუ საჭიროა, პოლიტიკურ პასუხისმგებლობას აიღებს". პროტესტის შემდეგ კონფერენცია შეწყდა.