ანას ბაღის გადასარჩენად თბილისის მერიასთან საპროტესტო აქცია იმართება. ააქციის მონაწილეებმა მერს ყვითელი ბარათი უჩვენეს.

დღეს, 10 თებერვალს მერიაში ანას ბაღის შენარჩუნების მომხრეების საჩივარი განიხილება. ბაღის შენარჩუნების მომხრეებს ადგილზე მიტანილი აქვთ სხვადასხვა ბანერი: "რა ხდება ტოო", "კახი, ხალხია შენი არბიტრი" და ა.შ.

"მოვაწყვეთ აქცია-პერფორმანსი, რათა კახის [კალაძეს] მისთვის ყველაზე გასაგებ ენაზე ავუხსნათ, რომ მას აქვს ყვითელი ანთებული და არ გვაიძულოს, რომ ავუნთოთ წითელი, რადგან მისი მოქმედებები მაგისკენ მიდის, რომ მას საბოლოოდ დისკვალიფიკაცია მოუწევს", — ამბობს ერთ-ერთი აქტივისტი, რომელიც აქციიდან პირდაპირ ეთერში იყო.

ვარკეთილში ანას ბაღის დასაცავად მოსახლეობა აქციას რამდენიმე თვეა მართავს. მათ უნდათ, რომ 10 სართულიანი კორპუსი არ აშენდეს, რადგან პარკის არსებობას საფრთხის წინაშე აყენებს. ერთ-ერთი ბოლო აქცია 10 იანვარს გაიმართა. იმ დღეს პოლიციამ ანას ბაღის 10 დამცველი დააკავა.