საქართველოს აეროპორტების გაერთიანების ინფორმაციით, 2020 წლის იანვარში, საქართველოს აეროპორტები ჯამში 314 079 მგზავრს მოემსახურა, რაც 3 პროცენტით ნაკლებია წინა წლის ანალოგიურ პერიოდთან შედარებით (2019 წელი 324 552 მგზავრი).

უწყების განმარტებით, ამის მიზეზი რუსეთის პრეზიდენტის მიერ 2019 წლის 8 ივლისს საქართველოსთან ცალმხრივად შეჩერებული საჰაერო მიმოსვლაა, ასევე, კორონავირუსის პრევენციის მიზნით ჩინეთთან პირდაპირი საჰაერო მიმოსვლის შეწყვეტა.

სტატისტიკის თანახმად, თბილისის საერთაშორისო აეროპორტი 2020 წლის იანვარში 211 590 მგზავრს მოემსახურა, რაც 16 პროცენტი ნაკლებია წინა წლის ანალოგიურ პერიოდთან შედარებით (2019 წელი მგზავრი 252 176).

2020 წლის იანვარში გაიზარდა მგზავრთნაკადი ქუთაისის საერთაშორისო აეროპორტში. დავით აღმაშენებლის სახელობის აეროპორტი იანვარში 79,759 მგზავრს მოემსახურა, რაც 43 პროცენტით მეტია შარშანდელ ანალოგიურ პერიოდთან შედარებით.

თბილისისგან განსხავებით, ზრდის ტენდენცია შენარჩუნებულია ბათუმის საერთაშორისო აეროპორტში. 2020 წლის იანვარში ბათუმის ალექსანდრე ქართველის სახელობის საერთაშორისო აეროპორტით 22 001 მგზავრმა ისარგებლა, რაც 38 პროცენტით მეტია შარშანდელ ანალოგიურ პერიოდთან შედარებით.