ზუგდიდის მერია ქალთა და დედის დღისადმი მიძღვნილი ღონისძიებისთვის 20 ხორცსაკეპ მანქანას შეიძენს. ტენდერი შესყიდვაზე განათლების, ძეგლთა დაცვის, კულტურის, სპორტისა და ახალგაზრდულ საქმეთა სამსახურმა გამოაცხადა. ხორცსაკეპების შესყიდვის სავარაუდო ღირებულება 3 980 ლარია. სატენდერო დოკუმენტაციის შესახებ ინფორმაცია ადგილობრივმა გამოცემა ლაივპრესმა გაავრცელა.

ზუგდიდის მერიაში On.ge-ს უთხრეს, რომ საოჯახო ტექნიკას ყოველ წელს გასცემენ ხოლმე საჩუქრად ქალთა დღისთვის. პრესსამსახურში თქვეს, რომ გასულ წელს მათ ქალებს აერო გრილი გადასცეს.

"ვინაიდან ქალბატონებზეა საუბარი, არჩევანი საოჯახო ტექნიკაზე შეჩერდა. ამ შემთხვევაში, 20 ქალზეა საუბარი. მათ შორის, შეიძლება იყოს ხელოვანი, პედაგოგი, ნებისმიერი სფეროს წარმომადგენელი. მუნიციპალიტეტის მერიისგან გაეგზავნება 20-ვე მოქმედ ორგანიზაციას წერილი და ისინი თავად შეარჩევენ, თუ ვის წარადგენენ ქალთა ღონისძიებისთვის. ისინი ალბათ, გამორჩეულობით ან განსხვავებულობით შეარჩევენ მათ", — ამბობს ზუგდიდის მერიის პრესსამსახური.