კლინიკა ჰელსიკორის დირექტორი, რუსუდან ლაგვილავა, ამბობს, რომ ავთანდილ წერეთლის მდგომარეობა კლინიკაში შესვლის დროს მძიმე იყო, ახლა კი სტაბილურია. ექიმის თქმით, პაციენტი უგონო მდგომარეობაში მიიყვანეს მათთან:

"კლინიკაში შემოსვლისას ჰქონდა დაბალი წნევა, ჩატარდა პირველადი ანალიზები, კორონაროგრაფია. იყო ცვლილებები გულზე, მაგრამ ამ ეტაპზე ექიმმა თავი შეიკავა სტენდირებისგან. მიმდინარეობს პაციენტზე დაკვირვება და რჩება კლინიკაში. როგორც ჩანს, ეს არის ძალიან დიდი სტრესის შედეგი".

დღეს, 6 თებერვალს, საღამოს TV პირველის მფლობელის, ვატო წერეთლის მამა, ავთანდილ წერეთელი საავადმყოფოში გადაიყვანეს. ვატო წერეთლის თქმით, მან მამა სააბაზანოში, უგუნო მდგომარეობაში იპოვა. იგი მამის ჯანმრთელობის პასუხისმგებლობას ხელისუფლებას აკისრებს და მომხდარს ყოველდღიურ სასამართლო პროცესებს უკავშირებს.

"დღეს რომ მოვიდა, მითხრა, უეჭველი მიჭერენო, შემდეგ ამბობდა, ცივი ოფლი მასხამსო, შაქარი გაიზომა და აბაზანაში გავიდა", — თქვა ვატო წერეთელმა ინგა გრიგოლიას გადაცემა რეაქციას პირდაპირ ეთერში.

მანამდე, თბილისის საქალაქო სასამართლოში მოსამართლე გიორგი არევაძე თიბისის საქმეს რამდენიმე საათის განმავლობაში განიხილავდა. ამ საქმეში ერთ-ერთი ბრალდებულია ავთანდილ წერეთელი. წინა სხდომაზე დაცვის მხარემ მოსამართლე არევაძე "მიკერძოებულობაში" დაადანაშაულა. მათი თქმით, მოსამართლე საქმეს "ფორსირებულად განიხილავს", რადგან ახლოვდება არჩევნები.

27 აგვისტოს ფულის გათეთრების ხელშეწყობის საქმეში ავთანდილ წერეთელს აღკვეთი ღონისძიების სახით 500 ათასი ლარის ოდენობის გირაო შეუფარდეს. ავთანდილ წერეთელი ბრალს არ აღიარებს და ამბობს, რომ ფულის გათეთრებას ადგილი არ ჰქონია. სასამართლო პროცესზე მან განაცხადა, რომ მისი ერთადერთი შემოსავალი პენსიაა, ხოლო ოჯახი მცირე შემოსავალს TV პირველიდან იღებს.