შინაგან საქმეთა სამინისტროს ცნობით, უცხო ქვეყნის მოქალაქის განზრახ მკვლელობისა და იარაღის შეძენა-შენახვის ბრალდებით ერთი პირი თბილისში დააკავეს. უწყება არ აკონკრეტებს, რომელი ქვეყნის მოქალაქეა გარდაცვლილი.

გამოძიებით ვერსიით, ბრალდებულმა თბილისში, სოლომონ დოდაშვილის ქუჩაზე, ურთიერთშელაპარაკების ნიადაგზე, მეზობელი, 1986 წელს დაბადებული უცხო ქვეყნის მოქალაქე იარაღიდან გასროლით დაჭრა. მიყენებული ჭრილობების შედეგად, კაცი ადგილზე გარდაიცვალა.

პოლიციამ შემთხვევის ადგილიდან მკვლელობის ჩადენის იარაღი ნივთმტკიცებად ამოიღო. გამოძიება განზრახ მკვლელობისა და ცეცხლსასროლი იარაღის უკანონო შეძენა-შენახვა-ტარების ფაქტზე, საქართველოს სსკ-ს 108-ე მუხლით და 236-ე მუხლის მე-3 და მე-4 ნაწილებით მიმდინარეობს. დანაშაული 7-დან 15 წლამდე ვადით თავისუფლების აღკვეთას ითვალისწინებს.