იურიდიული კომიტეტის თავმჯდომარე, ანრი ოხანაშვილი ამბობს, რომ საარჩევნო სისტემის ცვლილებაზე ეუთო/ოდირის დასკვნით, ნაციონალური მოძრაობის "პანაშვიდი" დაიწყო. ოხანაშვილი ოპონენტებს მიმართავს, რომ თუ "კარგი იურისტები" არიან და "კითხულობენ ტექსტს", გამოვიდნენ და საზოგადოებას უთხრან ერთი წინადადება, სადაც წერია, რომ გერმანული მოდელი საქართველოს კონსტიტუციას შეესაბამება.

"იმდენად უნიათოები არიან, რომ ტყუილსაც ვეღარ ამბობენ და ყოველ წამს ცვლიან. ერთს გეტყვით, რომ პოლიტიკურად ხელოვნურ სუნთქვაზეა ნაციონალური მოძრაობა, ტაიმერი ჩართულია, დღეს ნაციონალური მოძრაობის პოლიტიკური პანაშვიდი დაიწყო. ეს დასკვნა არის ამის მიმანიშნებელი", — განაცხადა ოხანაშვილმა.

ეუთო/ოდირის დასკვნა საარჩევნო სისტემის ცვლილებაზე გუშინ, 5 თებერვალს გამოქვეყნდა. ეუთოს დოკუმენტში აღნიშნულია, რომ საარჩევნო მოდელთან დაკავშირებით გადაწყვეტილების მიღება ქვეყნის სუვერენული უფლებაა, თუმცა ასევე, წერია ისიც, რომ კანონის კონსტიტუციასთან შესაბამისობაზე საბოლოო გადაწყვეტილება ადგილობრივმა სასამართლოებმა უნდა მიიღონ.

დოკუმენტში აღნიშნულია ისიც, რომ შემოთავაზებული ე.წ. გერმანული მოდელი აკმაყოფილებს უნივერსალური, თავისუფალი, ფარული და პირდაპირი ხმის მიცემის, ასევე, პერიოდული არჩევნების პრინციპებს.

ეუთო აცხადებს, რომ ნებისმიერი საარჩევნო ცვლილება საგულდაგულოდ უნდა განიხილონ და პარტიებმა ფართო კონსესუსით მიიღონ.