ფინანსთა მინისტრის, ივანე მაჭავარიანის განცხადებით, მთავრობამ საგადასახადო კოდექსში შესატანი ცვლილებების პროექტი დაამტკიცა, რომელიც ინვესტორებისთვის ხელსაყრელ პირობებს შექმნის. მისი თქმით, კოდექსი დაუახლოვდება ევროკავშირის კანონმდელობას ისე, რომ არ გაართულებს დღგ-ს ადმინისტრირების პროცესს და შენარჩუნდება ამისთვის საჭირო ყველა არსებული ნორმა და მექანიზმი.

მისივე თქმით, ცვლილებები იძლევა შესაძლებლობას, რომ საქართველომ პრაქტიკაში გამოიყენოს ევროსასამართლოს გადაწყვეტილებები და ინტერპრეტაციები დღგ-სთან დაკავშირებით, რაც გაუმარტივებს ქართულ სასამართლოებს ამ საკითხებზე გადაწყვეტილებების მიღებას.

"შედეგად მივიღებთ იმას, რომ მკვიდრდება საუკეთესო ევროპული პრაქტიკა, რაც ხელს შეუწყობს საქართველოსა და ევროკავშირს შორის ურთიერთობების გამარტივებას, ევროპელი ბიზნესსუბიექტებისთვის უფრო ნაცნობი გარემოს შექმნას საქართველოში...

შედეგად ველოდებით სადავო შემთხვევების შემცირებას და დღგ-სთან დაკავშირებული ვალდებულების უფრო მარტივ და სწრაფ აღსრულებას", — განაცხადა მინისტრმა.