ქართული ოცნების ლიდერმა, გია ვოლსკიმ პარლამენტში ბიუროს სხდომის გახსნაზე თქვა, რომ აქციის გამო "გარეთ ცოტა ხმაურია", თუმცა ეს მათ მუშაობაში ხელს ვერ შეუშლით. სხდომის მიმდინარეობისას დარბაზში ისმოდა პარლამენტთან შეკრებილი აქციის მონაწილეების სასტვენებისა და საყვირების ხმა.

"ბიუროს სხდომას გახსნილად ვაცხადებ, სამწუხაროდ გარეთ ცოტა ხმაურია, მაგრამ ეს არ შეგვიშლის მუშაობაში, ვინაიდან საკითხები, რომლებიც განხილვის დღის წესრიგშია დღეს და შემდგომ სხდომებზეც არის საგანგებო მნიშვნელობის ჩვენი ქვეყნისთვის, აქედან გამომდინარე, მე ვფიქრობ, რომ დილის შეკრებაც, რომელიც ჩვენ ჩავატარეთ არანაირად არ უკავშირდება იმ თემას, რომ უმრავლესობას არ აქვს დღის წესრიგზე გარკვეული პოზიციები და თითქოს მთელი ჩვენი ენერგია და აქტივობები არის დაკავშირებული, ან არის შესაბამისობაში მოსაყვანი იმ აქტივობასთან, რასაც ზოგიერთი ბოიკოტის რეჟიმში მყოფი დეპუტატი გარეთ ატარებს", — თქვა გია ვოლსკიმ.

ბიუროს სხდომაზე ვიცე-სპიკერმა აღნიშნა, რომ არის საკითხები, რომელშიც ოპოზიციის წევრი დეპუტატები კარგად ერკვევიან, "თუმცა არ უნდათ, რომ გაერკვნენ". მისი თქმით, განსაკუთრებით სამწუხაროა, რომ ოპოზიციას ახალგაზრდების გარკვეული ჯგუფია "აყოლილი".

საქართველოს პარლამენტთან ოპოზიციისა და აქტივისტების საპროტესტო აქცია "სირცხვილის კორიდორები" დაიწყო. პროტესტის მონაწილეები ბანერებით და სასტვენებით დგანან. აქტივისტები აპირებენ, რომ პარლამენტში შესულ დეპუტატებს დახვდნენ და ამ ფორმით დისკომფორტი უქმნიან.

"სირცხვილია", "თავისუფლება პოლიტპატიმრებს", "ბიძინა ვირუსი" — ამ და სხვა პლაკატებით ისინი ორ სხვადასხვა შესასვლელთან, ჩიტაძისა და ჭიჭინაზის ქუჩაზე დგანან.