ყოფილი გენერალური პროკურორის და გენერალური პროკურორობის კანდიდატის, ირაკლი შოთაძის განმარტებით, თანამდებობიდან ხორავას ქუჩაზე მომხდარი მკვლელობის საქმეზე საზოგადოებასთან კომუნიკაციის პრობლემის გამო გადადგა.

ირაკლი შოთაძემ გენერალური პროკურორის თანამდებობა 2018 წლის 31 მაისს დატოვა. მისი თქმით, გადადგომის გადაწყვეტილება სახელმწიფოს ინტერესებიდან გამომდინარეობდა.

"მაშინ, მე ვფიქრობ, შეიქმნა განსაკუთრებული სიტუაცია, როდესაც მართლაც მძიმე სისხლის სამართლის საქმეზე საზოგადოებასთან კომუნიკაციის პრობლემა შეიქმნა. შესაბამისად, ჩვენ ვხედავთ ყოველდღიურად, პოლიტიკური ჯგუფები, პოლიტიკური პარტიები, ვინაიდან სისხლის სამართლის საქმეები აქტუალურია საზოგაოდებაში, ხშირად ცდილობენ ამ საქმეების პოლიტიკური ინტერესების მიზნით გამოყენებას. მე ვფიქრობ, რომ ამ პერიოდში შექმნილი სიტუაცია და საზოგადოებაში არსებული გაუგებრობა მეტწილად განპირობებული იყო პოლიტიკური პარტიების მხრიდან ამ ტრაგედიით მანიპულირებით", — თქვა ირაკლი შოთაძემ.

ყოფილი გენერალური პროკურორის თქმით, ხორავას ქუჩის საქმეზე საზოგადოება შეცდომაში იყო შეყვანილი და საქმეზე მაშინ გრძელდებოდა გამოძიება. ირაკლი შოთაძემ განმარტა, რომ "საზოგადოების წინაშე ჩემი მთავარი მესიჯი იყო ის, რომ თანამდებობა არაფერს არ წარმოადგენდა, ეს იყო შესაძლებლობა კანონის და საზოგადოების სამსახურში ვყოფილიყავი".

გენერალური პროკურორის თანამდებობა ვაკანტური მას შემდეგ გახდა, რაც მოქმედი გენერალური პროკურორი შალვა თადუმაძე უზენაესი სასამართლოს უვადო მოსამართლედ დაინიშნა. გენერალური პროკურორობა 16 კანდიდატს სურს.

ოპოზიციისა და სამოქალაქო საზოგადოების კრიტიკა გამოიწვია შოთაძის კანდიდატურამ, რომელმაც თანამდებობა 2018 წელს, მას შემდეგ დატოვა, რაც თბილისის საქალაქო სასამართლოს გადაწყვეტილებით ხორავას ქუჩის საქმეზე არასრულწლოვანი დავით სარალიძის მკვლელი ვერ გამოვლინდა და საპროტესტო აქცია დაიწყო. შოთაძის გადადგომას მოკლულის მამა ზაზა სარალიძე და მისი მხარდამჭერები ითხოვდნენ.

პროკურატურიდან წასვლის შემდეგ შოთაძე ტექნიკურ უნივერსიტეტში საერთაშორისო სამართლის ფაკულტეტის მიწვეულ ასოცირებულ პროფესორად მუშაობდა. გარდა ამისა, ის სილქნეტის იურიდიული კონსულტანტი იყო. არასამთავრობოები მოუწოდებენ საპროკურორო საბჭოს, ირაკლი შოთაძის კანდიდატურას მხარი არ დაუჭირონ.