ქართული ოცნების აღმასრულებელი მდივნის, ირაკლი კობახიძის განცხადებით, კარჩევნები მშვიდ გარემოში მიმდინარეობს და მნიშვნელოვანი დარღვევები არ ფიქსირდება:

"ენმ ავრცელებს ინფორმაციას, რომ რამდენიმე ქალაქში, ქუთაისში, გორში და რუსთავში, ქართული ოცნება გეგმავს გარკვეულ პროვოკაციებს და თითქოს ხდება ჩვენი მხრიდან სპორტსმენების მობილიზაცია, რაც არის მტკნარი სიცრუე. ამაზე ჩვენ შეგვიძლია თამამად ვისაუბროთ. ვერცერთი ფაქტი ვერ იქნება წარმოდგენილი იმასთან დაკავშირებით, რომ ჩვენი მხრიდან სპორტსმენების რაიმე ფორმით მობილიზაცია ხდება. კიდევ ერთხელ, ეს არის დეზინფორმაცია და ეს ყველაფერი შესაძლოა მიანიშნებდეს იმაზე, რომ თვითონ ენმ-ს, შესაძლოა, ჰქონდეს დაგეგმილი გარკვეული პროვოკაციები. ჩვენ კიდევ ერთხელ მოვუწოდებთ ჩვენს მხარდამჭერებს, ჩვენს აქტივისტებს სიმშვიდისკენ და მოვუწოდებთ იმისკენ, რომ არ აჰყვნენ ისინი პროვოკაციებს. ნაციონალური მოძრაობის მხრიდან, ყოველთვის, როდესაც იქნება გარკვეული ნიშნები პროვოკაციის, მათ უნდა მიმართონ სამართალდამცავ ორგანოებს. ეს არის ჩვენი მოწოდება. კიდე ერთხელ, ამომრჩევლებს მოვუწოდებთ აქტიურობისკენ, ძალიან მნიშვნელოვანია, რომ თითოეულმა ამომრჩეველმა კიდევ ერთხელ დააფიქსიროს თავისი სამოქალაქო პოზიცია და გაამყაროს ის საარჩევნო შედეგი, რომელიც დაფიქსირდა 8 ოქტომბერს".