საქართველოს ყოფილმა პრეზიდენტმა, მიხეილ სააკაშვილმა ჩინეთის მოქალაქეების მიმართ ქსენოფობიური განცხადება გააკეთა. მან კორონავირუსზე საუბრისას თქვა, რომ ჩინეთის არცერთი მოქალაქე საქართველოს მიწაზე არ უნდა ადგამდეს ფეხს, სანამ ეპიდემიის საფრთხეა.

სააკაშვილი ვიდეო მიმართვაში არ ახსენებს პირდაპირი ფრენების გაუქმებას, ის მხოლოდ ჩინელებზე საუბრობს და ხელისუფლებას მოუწოდებს, "სასიკვდილო დაავადების" გამო დაუყოვნებლივ აკრძალოს ჩინეთის მოქალაქეების შემოსვლა საქართველოში საჰაერო, საზღვაო და სახმელეთო გზით.

"ეს არ არის რეკომენდაცია, თუ კიდევ ოდნავ სინდისის და საღი აზრის ნატამალი შერჩენია ივანიშვილს, მან ეს უნდა გააკეთოს დაუყოვნებლივ. არც ერთი ჩინეთის მოქალაქე საქართველოს მიწაზე არ უნდა ადგამდეს, სანამ არის ეპიდემიის ასეთი საფრთხე და სანამ არ მომხდარა მასობრივი გავრცელება, რისი დიდი საფრთხეც არსებობს მათ შორის საქართველოსთან მიმართებით", — თქვა მიხეილ სააკაშვილმა.

კორონავირუსი ჩინეთის გარდა მსოფლიოს 20-მდე ქვეყანაშია გავრცელებული, მათ შორის ევროპაში, ამერიკასა და ავსტრალიაშიც. მსოფლიოს მასშტაბით კორონავირუსის 100-ზე მეტი შემთხვევაა დაფიქრებული. მეცნიერებმა დაადასტურეს, რომ ვირუსი ადამიანიდან ადამიანზე ვრცელდება, თუმცა ეს არ ნიშნავს, რომ მას მხოლოდ ჩინეთის მოქალაქეები, ან მხოლოდ ადამიანები ავრცელებენ. შეზღუდვები, რომელიც ჩინეთში ფრენებთან დაკავშირებით დაწესდა ეხება ზოგადად ჩინეთიდან ჩამოსულ ადამიანებს და არა მხოლოდ ჩინეთის მოქალაქეებს.

საქართველოს მთავრობამ ჩინეთთან ფრენების გაუქმების გადაწყვეტილება რამდენიმე დღის წინ მიიღო. დღეს, 30 იანვარს ცნობილი გახდა, რომ ქართული მხარე თურქეთთან მოლაპარაკებებს აწარმოებს, რომ უხანიდან საქართველოს მოქალაქეები წამოიყვანოს.