ქართული ოცნების გენერალური მდივანი და თბილისის მერი, კახა კალაძეს ამბობს, რომ ე.წ. რიყის დოქები 1 ლარად ვერ გაიყიდა და საეჭვოა, რომ 95 მილიონად გაიყიდოს. მისი თქმით, შენობაში 20 მილიონის სარემონტო სამუშაოებია ჩასატარებელი.

"ჩვენ გვქონდა არაერთი მოლაპარაკება ბიზნეს სექტორთან, მზად ვიყავით 1 ლარად გადაგვეცა ოღონდ საინვესტიციო ვალდებულებით, რომ მოეწესრიგებინათ და ჩაეტარებინათ სარემონტო სამუშაოები, თუმცა არავინ არ დაინტერესდა. დღეს უკვე ოფიციალურად არის გამოტანილი რომ გაიყიდოს, თუმცა არ ვიცი ეს რამდენად რეალური იქნება და რამდენად გადაიხდიან 95 მილიონს, მაშინ, როდესაც დაახლობით 20 მილიონის სამუშაოებია ჩასატარებელი, რომ მოწესრიგებული იყოს, რემონტი იყოს ჩატარებული და რაიმე კონკრეტული ფუნქცია მიენიჭოს", — თქვა კახა კალაძემ.

დღეს, 30 იანვარს მთავრობის სხდომის შემდეგ ეკონომიკის მინისტრმა, ნათია თურნავამ თქვა, რომ ე.წ. რიყის დოქები 95 მლნ ლარად გაყიდება. მისი თქმით, აუქციონი მომდევნო კვირას დაიწყება. მინისტრის განმარტებით, ე.წ. დოქების ფასი სამხარაულის ეროვნული ექსპერტიზის ბიუროს მიერ არის შეფასებული და გათავალისწინებულია ის, რომ ობიექტის მშენებლობა "საკმაოდ ძვირი დაჯდა".